Nagaon, Jylliew 23:U Myntri ka sorkar pdeng u ba khmih ia ka tnat Ports, Shipping & Waterways bad Ayush, u Sarbananda Sonowal ha ka sngi Balang ba la lah u la pynlong ka jingleit jurip ia ki jaka shong shipor jong ki lanot shlei um hapoh Phulaguri Higher Secondary School.
Kane ka jingleit jurip jong une u myntri ka long ban bishar bniah halor ki lad jingiarap ha ka ba u la iamir jingmut ruh ba kine ki briew ki ba don ha kine ki jaka sah shipor. U Sonowal u la pynpaw ruh ka jingsngewlem na ka bynta ki ba haiing hasem ki ba la duh noh ia la ki jong ki ba ieit ba thoin ha kane ka jingshlei um ka ba dang iai bteng.
Ban bishar bniah halor ka jingduh jingsat bad ki jingjulor lyngba ka jingshlei um, ka kynhun ka sorkar pdeng shen kan sa wan poi ha kane ka jylla, pyntip une u myntri ka sorkar pdeng. Hadien ka jingwan jurip, kane ka kynhun kan pynkhreh ruh ia ka kaiphot bad phah sha ka sorkar khnang ba kan phah ia baroh ki lad jingiarap sha ki paidbah ki ba la shah ktah ha kane ka jingshlei um.
Ha ba aijingkren hadien kane ka jingleit jurip ia ki ktem sah shipor, u Sonowal u la ong ba ka jinglong jingman na ka jingshlei um ha Assam ka la long ka ba shyrkhei shibun. U la ong ruh ba na ka liang ka sorkar ka dang bishar bniah ha ka ba iadei bad ki lad jingiarap bad jingkyrshan na ka bynta ki briew ki ba la shah ktah ha kane ka jingjia.
Na ka liang u Myntri Rangbahduh (PM) Narendra Modi kumjuh u Myntri ka sorkar pdeng u Amit Shah ruh ki la bishar bniah halor ka jinglong jingman namar ka jingshlei um ha Assam. Kine ki arngut ki la pynpaw ruh ka jingsngewkhia ka ba jur halor kane ka jingshah pynjulor ba shyrkhei ha ki bor ka mariang bad pynthikna ruh halor baroh ki lad jingiarap na ka sorkar pdeng.
Nalor kata ki la ong ruh ba na ka liang ka sorkar pdeng ka dang iatrei ryngkat ryngkat lang bad ka sorkar jylla ha ka ba iadei bad ki lad jingiarap sha ki briew ki ba la shah ktah ha kane ka jingjia.
