Shillong, Jymmang 03: U MDC ka Mawlai u bah Teibor Pathaw hynne ka sngi ula leit jurip iaka jingtrei pynbha bad pynitynnad iaka jaka peitkai ia ka Kshaid Sunapani kaba don ha Mawlai Nongkwar.
Lah bad kdew ba u bah Teibor Pathaw ula pynioh iaka skhim kaba kot T.1 klur naka KHADC lyngba ka skhim ‘Council Assets’ ban pynbha bad pynitynnad iaka jaka peit kai ban iohi iaka kshaid Bishop bad Beadon’s Fall.
U bah Teibor ula leit hi dalade ban jurip naka bynta ban buddien iaka jingpyntrei bad ula kubur ruh baka jingpyntrei ka long kaba iaid beit iaid ryntih.
U bah Teibor ula shim iaka jingkitkhlieh ban pynbha bad pynitynnad ia kane ka jaka khnang ban khring iaki nongwan peitkai ia kine 2 tylli ki kshaid kiba pawnam hapoh kane ka Nongbah Shillong.
Ula pynpaw ba ka jingdon jong kine ki kshaid ha kane ka thain kan kyntiew ruh iaka ioh kam ioh jam ki samla bad ban don ka lad kamai kajih namar ka jingwan kai ki briew ban peit ia kine ki kshaid ba itynnad.
Ia u MDC la synran lang da u Rangbah Shnong ka shnong Mawlai Nongkwar bah Moonstar Rumnong bad ki engineer ka district council haka jingdon lang ki dkhot nongkitkam shnong.
