Tura, Risaw 08 : U Myntri Rangbah ka Jylla Conrad K Sangma ha ka sngi Ba-ar, ula leit jurip ia ki jaka ba shlei um bad ba twa khyndew ha West Garo Hills District bad iakynduh ruh ia ki lanot ha ki jaka sah ba shipor bad ki shnong nalor ka jing sam ia ki song jingiarap pisa sha ki bahaiing jong ki briew ba iap ha kane ka jinglynshop ki bor ka mariang.
Ka Ri-lum Garo kala shah lynshop ha ka jingther u slap, uba wanrah ia ka jingshlei um ba shyrkhei bad ruh ki jingkhynra khyndew ba itriem ha kine ki 4 sngi bala leit noh, kaba sdang naduh ka sngi Palei jong ka taiew bala lah. Ka jingshlei um bad jingtwa khyndew kala shim haduh 17 ngut ki mynsiem briew ha ki 4 tylli ki District.
Haduh 7 ngut ki briew na kajuh ka longiing, kila iap na ka jingshah tep im ha ka khyndew ba twa ha South Garo Hills, 5 ngut ha West Garo Hills, 3 ngut ha East Garo Hills bad 2 ngut ha North Garo Hills.
Haba kner lem ia ki kti jingiarap sha ki lanot, u Myntri Rangbah dalade ula leit iakynduh ia ki lanot bad ula aiti ia ka song jingiarap pisa ba ma T.4 lak sha iwei pa iwei na kiba khlad.
Ha Rongkhon Songgital, ula aiti ia ka song jingiarap pisa ba T,.8 lak sha ka kurim u (L) Bijoy Marak, u nonghikai uba shah rong umsaw bad u Khun ba 13 snem Wian Chigado R Marak ha ka janmiet sngi Thohdieng.
Ula iakynduh ruh ia ki bahaiing jong ka Sarika M Marak ba 18 snem, kaba la iap na ka jingtwa khyndew ha ka shnong Karonggre, West Garo Hills bad aiti ia ka song jingiarap ba T. 4 lak.
Hadien kane, ula leit ban iakynduh ia ki Kmie Kpa jong u heprit Miando P Marak ba 5 snem ka rta, bad aiti ia ka song pisa ba T.4 lak. U Miado ula iap na ka jingshah ban ha ka khyndew kaba twa katba u dang ialehkai sha kyrpong iing ha Sorokpara, kaba hap ha Dalu, West Garo Hills ha ka sngi Thohdieng.
Ula leit ruh ban iakynduh ia ki bahaiing u Tengseng R Marak ba 28 snem ha Tibapara, kaba hap ha Dalu, uba la khlad na ka jingkhyllem u dieng halor ka kali ha Songsak, East Garo Hills ha ka miet sngi Saitjain. Ula aiti ia ka song pisa ba T.4 lak sha ki bahaiing jong une u lanot.
Nalor kane, ula leit ruh ban iakynduh ia ki bahaiing ka Santa Marak kaba shah tep im ha ka khyndew ba twa ha Koinabhui, kaba hap ha Dalu ha ka sngi Thohdieng. Ula aiti ia ka song jingiarap ba T.4 lak.
U Myntri Rangbah ula iaid leit peit ruh ia kylleng ki jaka ban peit ia ki jingpynjulor jong ka mariang bad iakynduh ia ki nongshongshnong ba shah ktah.
Hadien kane, ula pynlong ia ka jingialang bishar kam bad ki Bor District ka West Garo Hills lem bad ki Ophisar ka MSDMA ban lum jingkhein ia ki jingpynjulor ka jingshlei um bad jingtwa khyndew ha Dalu C&RD Block bad ban peit ruh ia ka jingiaid ki lad ai jingiarap sha ki lanot.
Ha Dalu C&RD Block, ki bor ka mariang kila ktah haduh 2630 tylli ki longiing bad ki bor District kila buh haduh 68 tylli ki jaka ai jingiarap bad sam ruh ia ka bam ka dih sha ki 17000 ngut ki lanot ba shah ktah.
Ha ka jingialang, u Conrad ula bthah ia ki Ophisar ban pynlong ia ka jingwadbniah ia ki Wah bad ki jaka kiba don jingma na ka jingshlei um nalor ban shim ia ki sienjam ha kaban leh eiei ban lah kiar ia ki jingpynjulor hadien habud.
Ula bthah ruh ban maramot noh mardor ia ki surok bad ki jingkieng hapoh ka Block bad ban pynthikna ha kaban pynpoi ia ki marbam sha ki shnong kiba shah ktah.
