Shillong, Jymmang 24 : U Myntri Rangbah ka Jylla Conrad K Sangma ula leit jngoh ia ka Tura Civil Hospital ha ka sngi Palei bad ula lum iaka jingialang bishar kam halor ki kam maramot bad wanrah ia ki tiar sumar ka juk ba thymmai ha kane ka jaka ai jingsumar ka Sorkar.
Ha kane ka jingleit jurip, ula ioh iakren ia ka jingiaid ki kam maramot bad ki bor pyniaid ka hospital, kaba la pyntrei hadien ka rai ba mih na ka jingialang ba dang shu dep shen, kaba iakren ia ka jingdonkam ban maramot bad wanrah ia ki tiar sumar ba thymmai.
U Myntri Rangbah ula shim ruh ia ka kabu ban iakynduh ia ki nongpang kiba leit leh ia ka surgery ha ka CATH lab. Ula ai khublei ia ki bor pyniaid bad ka kynhun ki doktor kiba don bynta ha ka jingleh surgery ia u klongsnam.
Ki doktor kila pyntip ha u halor ka jingdonkam ban pnkha ia ka critical cares unit ba thymmai na ka bynta ki nongpang klongsnam ha Tura Civil Hospital. Kila pyntip ruh ia ka jingdonkam jong kiwei kiwei ki tiar sumar bad ki Nongtrei ha ki Unit bapher bapher kynthup ka jingthungkam ia ki paramedics bad technician.
Haba kren ha ka jingialang bishar kam, u Myntri Rangbah ula ong “Ka dei ka jingangnud jong ka Sorkar ban kyntiew ia ki jaka ai jingsumar hapoh ka Jylla. Ngi la shimkhia ban iakren bad ki bor pyniaid jong ki hospital bapher bapher hapoh ka Jylla ban pynthikna ba ki jingtei bad ki tiar sumar kin dei kiba janai na ka bynta ban lah sumar bad shakri kham bha ia ki nongpang”.
Ula pyntip ruh ba ka Cath Lab ha Tura, kaba dang shu dep pyndait mynta arbnai, ka dei kaba donkam bha. Namar ka jingbym don ki tiar sumar ia ki nongpang klongsnam, bun ki nongpang na Ri-lum Garo kila hap ban leit shaduh sha Guwahati ban phah sumar. “Ka Cath Lab bad Cardiology Unit ha Tura Civil Hospital kala iarap bha ia ki nongpang ka Ri-lum Garo kiba donkam kyrkieh ia ki jingsumar klongsnam” ula ong.
Halor ka surgery ba dang shen ha ka CATH Lab, u Myntri Rangbah ula ong “Arngut ki nongpang kiba la dep leh surgery ki dei kiba la jur bha bad ka jingpynslem ban ai jingsumar ka lah ban lam sha ka jingiap. Nga ai ka jingiaroh ia ka kynhun ki doktor kiba la lah ban leh ia ka surgery kaba jop bad iada ia ka jingim jong ki nongpang”.
