Leit jurip ka UKPO bad BDO ia ka shnong Khasi ha Karbi ban pynpoi kam pynroi

Shillong, Iaiong 01 : Ki Nongialam ka United Khasi People’s Organisation (UKPO) lem bad ka Block Development Officer (BDO), kila leit jurip ia ka shnong Khasi ha Karbi Anglong District kaba la tip kum ka Dhansiri (Khasia Basti) ban lum jingtip ia ki jingeh jong ki paid Khasi bad ka jingdonkam ban pynpoi ia ki kam pynroi.

Ia kane ka jingjurip la lamkhmat da u President ka UKPO Bah Pynsngainlang Rattane bad ka BDO Rita Millickpi ha ka jingiadonlang u Gramsevak Komol Kro.

Kane ka kynhun bad ki Heh Ophisar kila ioh iakren markhmat bad ki nonghongshnong ban sngewthuh ia ki jingeh bad ki jingsngewkhia ba ki don nalor ban peit ia ki lad ki lynti ha kaban pyntreikam ia ki skhim ba donkam jong ka Sorkar.

Kane ka jingjurip ka phaikhmat kyrpang eh halor ka jingpynbiang ia ki jingdonkam ba manla ka sngi, ki jingtei, ki jaka sumar, ka pule dangle bad ka lad iohkam iohjam.

Kane ka kynhun kala leit jngoh ruh ia ki jingtei ban shim jingkhein ia ka jingduna bad peit ia ka jingdonkam pisa ban leh eiei noh mardor na ka bynta jong ki. Ka jingiakren kala iaid eh halor ki skhim ka bha ka miat u paidbah, ka jingpyniasoh surok, ka jingpynioh ia ka umbam umdih kaba khuid bad ki prokram ban kyntiew ia ka kamai ka kajih jong ki nongshong shnong khang ban lah kyntiew ia ka rukom im jong ki.

Ka BDO Rita Millickpi kala ai ka jingkular ia ki nongshongshnong ba kan sa shimkhia mar mar ia ki jingeh bala pynsngew. Kala ban jur halor ka jingdonkam ban iatreilang hapdeng ki bor Sorkar bad ka shnong khnang ban pynthikna ia ka roi ka par kaba neh slem.

Ka khyllipmat kaba kmen kaba wan hadien ba u Alien Chongloi, President ka Polling Station ka thain, ula pynpaw ia ka jingkyndit ia ka jingmih ki paidbah ban iashimbynta ha ka jingiakren. “Ka jingiashimbynta shirtem jong ki paidbah mynta ka sngi ka dei ka bym shym khmih lynti satia. Ka pyni ia ka jingangnud shisha ia ka jingkylla bad ka jingkiew shaphrang” ula kynthoh.