Shillong, Rymphang 16: Ka Additional Director General, BSF (Eastern Command) Kolkata, ka Sonali Mishra, IPS kala wan jurip iaka BSF Meghalaya Frontier ban peit iaka jinglong jingman haka rukom shakri jong ki shipai iada khappud ban wanrah ia ka jingshngain haki jaka khappud bad ka ri Bangladesh.
Kane ka heh BSF kan don 3 sngi ha Meghalaya bad la pdiang sngewbha ia ka da u Pradip Kumar, IPS, IG jongka BSF Meghalaya bad kiwei kiwei ki heh ophisar BSF.
U Kumar ula pynsngew haka ADG ia ki jaka kiba ka BSF ka pahara ha ki thaiñ khappud bad ka ri Bangladesh bad ula pynsngew ruh ia ki jingeh kiba ka BSF ka mad ha ki thaiñ khappud khamtam ha kaban tehlakam ia ki kam be-aiñ kiba jia ha khappud.
Ka Sonali Mishra hynne ka sngi kala leit ruh ban jurip iaka Border Out Posts (BOP) kiba don ha Pyrdiwah, Muktapur bad Dawki ha kabakala pynlut por ban iakren bad ki Field Commander jong ka BSF.
Nalor kane, kala khmih ha kaba iadei bad ka jingai jingshngain ia ki nongshong shnong ha ki khappud, ka jingpynkhreh ia ki ‘Operation’ na ka bynta ban pynlong iaka thain Khappud kaba lait na kino kino ki kam sniew ne kam be-aiñ.
Nalor kane, kala ai jingiaroh iaka jingtrei shitom bad jingtrei shitrhem ki shipai BSF ha kaban iada ia u pud u sam bad ia ki nongshong shnong ka ri bad ka jingpyrshang ka jongki ban tehlakam ia ki kam sniew.
Kane ka ADG kan lum ruh iaka jingialang jong ka Sainik Sammelan ha BOP Dawki haka 17 tarik u Rymphang ban iasyllok bad ban iatai ia ki jingeh kiba khraw kaba ki shipai kiba phahara ha ki khappud ki mad ne shem jingeh.
Ha katei ka jingialang kan don ruh ka jingiashimbynta jong kiwei pat ki heh ophisar ka BSF kiba don ha kiwei pat ki district jong ka jylla Meghalaya lyngba ka Video Conferencing.
