Shillong, Naitung 08: U Symbud Myntri Rangbah ka Jylla uba long ruh u Chairman jong ka Regional Committee ka West Jaintia Hills u Sniawbhalang Dhar hynne ka sngi Baar, ula pynthikna ban pynbeit noh ia ka jingiakynad kaba la mih dang shen, na ka jingwan thung dieng ka Assam ha ka shnong Lapangap, West Jaintia Hills District.
U Bah Sniawbhalang Dhar ula leit jngoh ia ka shnong Lapangap kaba hap hapoh ka Nartiang constituency ka jongu, ban khmih ia ka jinglong jingman bad ban shimkhia ia ka mat ha kaba iadei bad ka jingshngain bad jingiada ia ki nongshong shnong.
La synran ia u da u CEM ka JHADC u Bah Thombor Shiwat, ki MDC, u Deputy Commissioner u Abhinav Kumar Singh bad u Superintendent of Police u Jagpal Singh Dhanao.
U Bah Sniawbhalang ula leit jngoh ia ki jaka rep jong ki nongshong shnong ka Lapangap bad la pynlong ruh ia ka jingialang ha ka madan ialehkai jong ka shnong.
Ha ka 25 tarik u Jylliew, kala mih ka jingiakynad ha ka thain khappud jongka Assam bad Meghalaya haba palat 400 ngut na ka shnong Lapangap bad na ki shnong kiba marjan ha West Jaintia Hills ryngkat bad ki kynhun sengbhalang kila leit ban pynpra ia ki jingtei da ki dieng bad kila jynrat ruh ia ki tynrai dieng kum ka jingpyrshah ia katei ka jingwan thung ia ki dieng kaba la leh da ka Karbi Anglong Autonomous Council (KAAC), ia kaba kila ong, ba kadei tang ka jingthmu ban kyntur pud be-ain sha ki jaka jong ka jylla Meghalaya.
Haba iakren bad ki nongthoh khubor hadien katei ka jingwan jngoh, u Bah Sniawbhalang ula ong “Ki briew ki jong ngi ki pyrshah jur ia ka jingwan thung dieng bad dang shen kila leit ban jynrat ia baroh kitei ki tynrai dieng. Kumba long mynta, kim don shuh kitei ki jingthung(ha katei ka jaka)”.
“Kumba long mynta, la pynneh kumba ka long (status quo) hynrei ka jingeh ka long ba ki briew ki jong ngi kim lah ban leit sha ki jaka rep ki jong ki” ula ong.
Ula pynthikna da kaba ong, “Ngi ngin sa iakren ia kane ka mat ha kine ki sngi ban wan, khnang ba kin lah ban iaid laitluid kumba long mynshwa bad ba kan ym don kano kano ka jingpynthud hapdeng ka jong ki”.
Ula ong, ba shen ki Deputy Commissioner na baroh arliang kin sa iakynduh ban pynbeit noh ia katei ka mat.
Ula pyntip shuh shuh ba la buh ia 40 ngut ki pulit ha ka shnong Lapangap ban pynthikna ia ka jingshngain bad jingiada ia ki paidbah.
U Symbud Myntri Rangbah ula ong ruh ba kam shym la don kano kano ka jingtyrwa ban shna ia ka surok na Lapangap namar ba ki ar tylli ki Regional Border Committee kim pat iakynduh satia.
“Ngi dang ap ba kitei ki artylli ki Regional Committee kin iakynduh noh bad kane ka lah ban long hadien ba la dep ka elekshon ha ka jylla Assam,” ula ong.
