Shillong, Iaiong 30: U Myntri Sorkar uba khmih ia ka Tnad Jngohkai u Bah Paul Lyngdoh hynne ka sngi Baar ula leit jngoh ia ka Iew die Sohshan ne Strawberry Market kaba don ha Khyndailad bad pynthikna ba ka sorkar kan ialeh ban pynpaw nam ia une u soh bad ia kiwei pat ki soh bad ki jhur kiba pynmih ha ka jylla khnang ba kan khring ia ki nongjngohkai.
“Ka tnad Tourism ha kine ki ar taiew bala leit, kala pynlong ia ka Strawberry Festival ha Nohron, Syntung bad ha Sohliya ha kaba ki nongrep ki rep ia u Strawberry kila wan ban iashimbynta bad mynta kila shim ia ka sienjam ka baar ban pynlong ia kane ka iew ne Strawberry Market ban khring ia ki nongjngohkai bad kumjuh ia ki trai jylla ba kin tip ba ka don ka lad ka lynti ba ki nongrep ki jong ngi kin im, kin bit kin biang da ka jingiatreilang hapdeng ka tnad Tourism bad ka Horticulture” ong u Bah Paul.
Ula ong ba ka sorkar kan ialeh ban pyninam ia ka mar ba pynmih na ka jylla khnang ba kan khring ia ki briew kiba nabar ki ban pynsaphriang sha kiwei pat shaphang ki jhur bad ki soh kiba mih na kane ka jylla.
U Myntri Sorkar ula ong, lyngba ka jingiatreilang, ka tnad Agriculture bad Horticulture kin ai shuh shuh ia ki jingiarap ia ki nongrep bad kumba long mynta ki jaka kiba pynmih ia u Strawberry kila ioh ia ki surok kiba paka ha kaba ki kali kila lah ban poi syndon shaduh ki jaka rep bad leit kit soh.
U Bah Paul ula ong, ba ka jingwan jngoh jongu ka long ruh ban peit ia ki nongrwai kiba rwai ha kane ka rynsan lyngba ka Meghalaya Grasroot Music Project (MGMP) jong ka tnad Tourism.
“Kumba ngi ong ba ka Shillong kadei ka nongbah jong ka tem ka put kumta ngi kwah ban pynthikna ba ki briew mar syn poi ha Shillong kin poi shwa nyngkong ha Khyndailad bad kin iohi ia ka rwai ka siaw bad ka jingtem jingput ki nongrwai kiba donsap ki jong ngi” ong u Myntri Sorkar.
