Shillong, Lber 9: Ka kynhun ki nongthoh khubor ka jylla Meghalaya, kaba don ha Sikkim na ka bynta 6 sngi, hynne ka Sngi Nyngkong kala leit jngoh ia ka ICAR – National Research Centre for Orchids ha Pakyong ryngkat bad ki ophisar jong ka PIB Gangtok bad leit jngoh ruh ia ka Indian Orchid Festival 2026 kaba la pynlong halor ka mat “Orchids for Beauty and Prosperity”.
Ka kynhun kala ïakren bad ki scientist bad ki ophisar ha ka jaka wad bniah ban sngewthuh ïa ka kam kaba dang ïaid shakhmat ha ka jingpynneh pynsah, ka jingwad bniah bad jingpynroi ia ki syntiew Orchid.
Hadien kane kila leit jngoh ia ka Indian Orchid Festival 2026 kaba la pynlong 4 sngi ban da ka jingthmu ban kyntiew ïa ka jingbun ki jait syntiew Orchid jong ka Sikkim bad ban pynkhlain ïa ka kyrdan jong ka jylla kum ka jaka pdeng ha ka kam rep ïa ki syntiew Orchid.
Ha kane ka tamasa, ki nongthoh khubor ki la sakhi ïa ki jait syntiew orchid bapher bapher ba la pyni ha kane ka jaka, kynthup ïa ki jait syntiew ba la pynbha bad kumjuh ruh ki jait syntiew orchid ba don ha kane ka thain ba la wanrah na kylleng ka thain shatei lammihngi. Ka jingpyni kaba iphuh iphieng, kaba pyni ia ki syntiew orchid kiba bun rong, ki dur bad ki rukom bapher bapher, ka la pyniapbieit ia ki nongthoh khubor kiba la leit jngoh bad ka pyni ia ka jingbun ki jait synriew orchid kiba don ha kane ka thain. Kane ka jingpyni ka pynpaw ruh ia ka lad kaba nang kiew ha ka kam rep syntiew kum ka kam kaba kongsan na ka bynta ban pynmih ia ki lad kamai kajih bad ka jingseng kam seng jam.
Ka kynhun kala ïakren ruh bad ki nongrep Orchid bad ki riewshemphang kiba ïashim bynta ha kane ka tamasa bad kala ioh ruh ban iakynduh ia ki nongrep Orchid na Meghalaya kiba la wan sha kane ka tamasa.
Kala don ruh ka jingdie ia u syntiew Orchid da u Aten Subba na Mirik ha Darjeeling district jong ka West Bengal ha kaba ula die ia uwei u syntiew Cymbidium Orchid uba la ai kyrteng “Queen of Heart” ha ka dor T. 40,000.
Kane kaj ingleit ki nongthoh khubor ka Meghalaya kadei kaba la pynlong da ka PIB Shillong da ka jingthmu ban ai jingtip ia ki nongthoh khubor na Meghalaya ïa ki sienjam kiba jop kiba iadei bad ka roi ka par ha Sikkim, kaba plie lad ïa ki ban wanrah ia ki khubor shaphang ki rukom treikam ba bha tam, ki prokram ba thymmai bad ka jingpyntreikam ïa ki sienjam ba iadei bad ka roi ka par ha ki jaka nongkyndong.
