Shillong Lber 19: Ka KSU Bengaluru Unit kala leit jngoh bad leit ai mynsiem ia ki khynnah Khasi kiba la iohpang na ka jingbam kaba la sah bad kala ioh ruh ban ai ka jingiarap ia kitei ki khynnah.
U President ka KSU Bengaluru Unit u Donboklang Nongphud ula pynpaw ba ha kine ki sngi bala dep, ka jylla Karnataka ka la mad ia ka jingjia ba sngewsih ha kaba ki khynnah pule na ka skul Gokula Vidya Samsthe ha Malavalli, Mandya District, kila ioh pang hadien ba kila bam ia ka jingbam kaba la sah.
Ula pynpaw ba arngut ki khynnah pule na Meghalaya, kiba la tip kyrteng kum u Khrehlang Khongtani na ka shnong Lyndem bad u Name Bantei Marwein na ka shnong Lawse kila khlad noh bad kumba 120 ngut ki briew kila ioh pang hadien ba kila bam ia ka jingbam kaba la pynkhreh ha kawei ka hotel ha Malavalli. Kine ki kynthup ia 40 ngut ki khynnah skul jong ka Gokula Vidya Samsthe, ha kaba 24 ngut ki khynnah skul kidei na Meghalaya.
Ula pyntip ba kine kiba pang ki dang don ha ka jaka sumar ha Mandya Institute of Medical Sciences katba 3 ngut pat ki dang shah sumar hapoh ICU bad kiwei pat ki la kham khlain.
Ula pynpaw ba ki dkhot jong ka KSU Bangalore Unit man la ka sngi ki leit ban jngoh ia ki khynnah Khasi kiba thiah pang bad ha ka jingiasyllok bad ki doctor ka hospital, la ioh jingtip ba kim pat long ban ai kino kino ki jingbam ia kine ki khynnah hynrei tang ka um snepkor bad kumta ki dkhot ka seng kila leit thied ia ka um snepkor ban ai sha kitei ki khynnah Khasi ba thiah pang.
