Shillong, Nailur 6: Ka Meghalaya Estimate Committee jong ka Iingdorbar Thaw Ain ka Jylla, ha ka sngi Balang, kala leit ban jurip ia ka jingtrei jong ka Residential School kaba don ha Sabahmuswang, West Jaintia Hills District.
Kane ka Committee ka dei kaba ialam da u Chairman bad MLA ka Nongpoh Bah Mayralborn Syiem bad la synran ia u da u MLA ka Mawkyrwat Bah Renikton L Tongkhar, u MLA ka North Shillong Bah Adelbert Nongrum, MLA ka Jowai Bah Wailadmiki Shylla, u MLA ka Selsella Arbinstone B Marak bad MLA ka Ampati Miani D Shira.
Kane ka jingjurip ka long ban khmih ia ka jingiaid ka jingtei bad ka jinglong jingman jong kane ka skul. Kine ki dkhot kila ailad ruh ia u Rangbah Shnong ka Sabahmuswang bad ia ki trai shnong ba kin pynsngew iala ki jong ki jingeh bad jingsngew halor ka jingtei ia kane ka skul bad ka jingtreikam jong ka.
Hadien kane, ka Shnong kala pynkup burom ia kine ki Dkhot ka Committee ha ka Iingdorbar Shnong ka Sabahmuswang.
Kiba iadonlang ha kane ka sngi ki kynthup ia u Deputy Commissioner ka West Jaintia Hills BS Sohliya, District School Education Officer, Jowai A P S A. P. Syiem bad kiwei.
