Shillong, Jymmang 26: U Lamphang ka Iingdorbar thawain ka jylla Thomas A Sangma ula leit iashimbynta ha ka 16th Canadian Parliamentary Seminar ha Ottawa naduh ka 25 haduh 29 tarik u Jymmang 2026, kaba la pynlong da ka Parliament of Canada.
Ka mat jong ka Seminar mynta u snem ka long ka iingdorbar ha u spah snem ba 21 ne 21st Century: Innovation and Adaptation for Democracy.
La lumlang ia baroh ki nongialam jong ki iingdorbar bad ki ophisar ban iatai sani halor ki jingeh kaba mad bad ka jingmih ki rukom leh ha kaba iadei bad ka kam synshar paitbah.
Ki mat kiba kongsan ki kynthup ia ka jinglong jingman ka rukom pyniaid ia ka iingdorbar ha Canada, ka kamram jongka Commonwealth Parliamentary Association, jingpyndon bynta ia ki samla ha ka kam synshar kaba iadei bad ki iingdorbar, ban kyntiew ia ki kynthei ha ka kam nongialam sain pyrthei, ki jingtei kiba thymmai kiba iadei bad ka iingdorbar bad ki sienjam kiban pyntreikam ban pynlong ia ka sorkar kaba don ia ka jingkitkhlieh.
Ki jingiatai kin kynthup ruh ia ka bynta kiba iadei bad ka riti ka dustur bad ki social media, jingthep vote da ki kor Elektronik bad ka lawei jongka Artificial Intelligence ha ki Parliament da kaba pynleit jingmut ha kiei kiei kiba long thymmai bad ka jingkitkhlieh.
La synran ia u Lamphang ka Meghalaya da u Malthus S Sangma u Secretary jongka Meghalaya Legislative Assembly bad u Bah Raja K Kharpuri u Deputy Secretary ka Meghalaya Legislative Assembly.
Ka jingiashimbynta jongka kynhun ka Meghalaya Legislative Assembly kadei kaba la khmih lynti ban ai ia ki jingtip kiba kordor halor ka jinglong jingman ka rukom pyniaid ia ki iingdorbar bad kiei kiei kiba thymmai, ban pynkhlain shuh shuh ia ka jingai jingshakri ha ka kam synshar paitbah bad ka rukom treikam jongki iingdorbar thawain ha ki jylla.
