Shillong Naitung 12: Ka kynhun jong ka jylla Meghalaya hapoh ka jingialam u Myntri ka tnad Fiseries u Bah AL Hek, kala leit iashimbynta ha ka 2nd Fisheries Summer Meet, 2024 kaba la long hynne ka sngi Thohdieng ha Madurai, Tamil Nadu kaba la pynlong da ka tnad Fisheries jong ka Sorkar India.
Ia u Bah AL Hek la synrang lang da u S.C. Sadhu u Secretary ka tnad Fisheries bad ka Kong A.L. Mawlong kaba long ka Director jong ka Fisheries.
La sdang ia katei ka jingialang da kaba plie iaki projek da u Myntri ka sorkar pdeng uba khmih ia ka Fisheries u Rajiv Ranjan Singh, ha ka jingdonlang u Myntri khynnah ka sorkar pdeng, ki myntri sorkar na ki jylla bad ki heh ki haiñ na kylleng ka ri India.
U Rajiv ula plie ia ki 4 tylli ki projek kiba kot T.57 lak na ka bynta ka Ri Bhoi District, ka Fish Kiosk ha Liarbang jong u Bah Ronal Tado, ka Biofloc Pond ha Mawkangi bad Mawiong, Sohbang jong u Bah Pyrkhatjngai Syngkli bad ka Kong Manbhatiolin Kharmyndai, ka Indigenous Breeding Unit ha Lalumpam Marngar jong u Bah Gumbir Syiem.
Haba kren ha ka jingialang u Bah A.L.Hek, ba ka sorkar jylla ka iengskhem ha ka nongrim ban pynneh pysah bad ban pynroi ia ka kam ri dohkha ha ka jylla kaban long ruh ka lad ban kyntiew ia ka ioh ka kot.
U Bah Hek ula pynpaw ruh ba watla ka jylla kala sdang dang ha ki katto katne snem kila don haduh 35,000 ki nopngri dohkha ha ka jaka kaba don 4,500 hektar bad ula banjur ba kala don ka jingkiew kaba 12.33% ha ka jingpynmih ia ki dohkha na ka 4799 Metric Ton ha u 2011-12 sha ka 20,208 Metric Tong ha u 2023-24 bad ula ai khublei ia kane kaj ingjop sha ka sorkar jylla bad sorkar pdeng kiba la shimkhia da kaba ai jingithuh ruh ia ki nongri dohkha ha ka jylla.
Ula ong, ba ka kam ri dohkha kam dei tang ka lad ban ioh kamai kajih hynrei kadei ruh ka kolshor bad kala don ka jingkiew ha ka ioh ka kot jong ka jylla ha kine ki 5 snem kiba la dep da ka jingpyntreikam ia ki prokram kum ka Blue Revolution bad PMMSY.
Nalor kane ula iaroh ruh ia ka jingtrei shitom jongka Meghalaya State Aquaculture Mission bad ka jingshimkhia ha kaban pynneh pynsah ia ki dohkha tynrai lyngba ka jingiatreilang bad ki shnong ki thaw bad ban pynkha ia ki symbai dohkha ki bapher bapher bad ula pynbna ba kane ka Mission kan sa bteng ban iaid ha ka wat ka balai da kaba buh ia ka thong ban lah ban pynmih bad ban pyndap iaka jingdonkam ia ka dohkha da kaba iaid ha ka lynti ban ai jingarap da ka song tyngka.
U Myntri Sorkar ula banjur iaka jingkongsan ha kaban pyllait mardor iaka bhah tyngka bad ula kyntu ia u Myntri ka Sorkar Pdeng bad ia ki heh ophisar ba kin pynkloi ha kaban ai jingmynjur bad ban pyllait ia ki scheme kiba la tyrwa da ka tnad Fisheries jongka jylla Meghalaya naduh u snem uba la dep na ka bynta ka jingmyntoi jong ki nongri dohkha.
