Nongstoiñ, Nailar 30: Ka kynhun jong ki nongtrei Mistery bad shna Furniture, kaba la tip kum ka All Furniture Association West Khasi Hills, lem bad kiwei kiwei ki riew paidbah hynne ka sngi Thohdieng, ki la leit ban jngoh bad ai jingiarap ïa uwei u samla rangbah u ba la thiah pang mynta la kumba 9 snem kynthih.
Utei u samla u dei u ba la tip kyrteng kum u Donbor Marshra 28 snem ka karta bad u la thiah pang naduh u snem 2014. Haduh mynta la kynjoh kumba 9 snem kynthih ba u la thiah pang hajuh khlem da lah shuh ban khie bad ban ïaid ban ïeng.
Ia kane ka kynhun la ialam da u bah Synsharbor Kharjahrin u ba dei u President ka seng bad u bah Kiew Langrin General Secretary ka Seng.
Kane ka kynhun ka la leit ban jngoh ïa utei u samla kum shibynta ban lait ai jingiarap bad sngew lem kum ka mynsiem para doh para snam.
Ïa u synñiang ym dei ba ai tang da ka seng jong ki, hynrei la snohkti lang bad kiwei kiwei ki riew paidbah kiba don mynsiem ka jingsngew lem. Na ka liang ki nongïalam ki la pynpaw ruh ïa ki kyntien sngew lem kyrpang na ka bynta utei u samla.
La ïadonlang ruh ha kane ka jingleit jngoh da u bah Overshilan Sangriang Sordar ka shnong Sangriang, ka kong Lila Nongkhar kawei na ki longkmie kaba la paw bha ha ka imlang sahlang ha ka thaiñ Nongstoiñ.
