Shillong, Nailur 03 : Ka Myntri ka Tnad ka Koit ka Khiah ka Jylla Kong Ampareen Lyngdoh, kala leit iakynduh ia ki samla ka Jylla ba trei kam nos ha Ri Japan, ban buddien ia ka jinglong jingman jong ki hadien ba kila jied ban leit trei ha kane ka Ri.
Ka Myntri kaba la don ha Japan, ha ka sngi Nyngkong, kala leit iuhkjat hapoh ka Tsurumaki Onsen Hosptal bad iakynduh ia lai ngut ki nos ka Jylla nalor u Director jong ka Institute.
Kine ki laingut ki nos ki kyrteng ka samla Shisha Lapyntngen Lartang, Launda B Ssangma bad Banniewkor Mukhim. Kine ki dei kiba la iohkam lyngba ka jingtrei shitom ka Sorkar Jylla bad ka Navic Corporation.
Ia ka Myntri la synran da u Secretary ka Tnad ka Koit ka Khiah Ram Kumar
Ha kane kajuh ka sngi, ka Myntri kala leit ban iuhkjat sa ha ALIVE Elderly Care Centre bad iakynduh ia ki bor pyniaid ban twad jingmut halor ka jingshakri jong ki nos ka Jylla.
Ka Myntri kala iakynduh ia u President kane ka jaka suar bad iakren halor ka jingkwah jong kane ka jaka sumar ban thung kam biang sa 10 ngut ki nos na Meghalaya.
Kane ka jaka sumar kan sa wan sha Shillong ha ka 17 tarik Nailur kum shibynta jong ka Job Fair ban thungkam ia ki Nos ki ban leit ai jingshakri sha Japan.
Mynta ka sngi, ka Myntri kan iakynduh ia u Ambassador ka India sha Japan ban iasyllok bad pan ia ka jingiatreilang nangne shakhmat.
Ha ka 5 tarik Nailur, ka Myntri kan leit sa sha Kurihara-Shi Miyagi Perfectore. Kan leit jngoh ia ka Mizudori Farm jong ka Yats Corpration Pvt Ltd ban lum jingtip bad jinghikai halor ka kam rep tit shitake.
Kane ka jingleit jngoh ka dei hdien ka Memorandum of Understanding bala iasoi hapdeng ka Yats Corporation Pvt Ltd bad ka Tnad Agricultre bad ka Hill Farmers Union (HPU) ha u snem 2019 na ka bynta ban rep ia u tit shitake ka Japan ha Meghalaya.
