Shillong, Iaiong 12: U MP ka Lok Sabha Bah Vincent Pala bad u MLA ka Mookaiaw Bah Nujorki Sungoh hynne ka sngi kila leit iakynduh ia u Symbud Myntri Rangbah ka jylla u Bah Prestone Tynsong ban buddien halor ka jingdonkam ban tei iaka Jingkieng halor ka Wah Testar kaba don ha Kympa Masi, East Jaintia Hills.
Katkum ka dorkhas kaba la aiti da kitei ki ar ngut ki nongmihkhmat na rilum Jaintia kila pynpaw iaka jingdonkam ban tei iaka jingkieng halor ka wah Testar bad kumjuh ruh ban shna iaka surok kaban pyniasoh iaka Kseh PMGSY bad Mooriap PMGSY.
U Bah Pala ula pynpaw haka dorkhas, da ka jingshna ia katei ka jingkieng kan pyniasoh iaka Raliang Elaka bad ka Sumer Elaka bad kan ai jingmyntoi ruh ia ki paidbah jong ka thaiñ Saipung bad Sutnga Elaka kiba don palat 30 tylli ki shnong bad kan pynduna shibun iaka leit ka wan jong ki paidbah haduh 70 Kilometer kiba na kitei ki ar tylli ki Elaka.
Ula pynpaw da ka jingshna iaka surok na Lakadong – Kseh PMGSY shaduh Mooriap bad Laskeiñ PMGSY kan ai jingmyntoi ia palat 40,000 ngut ki nongrep khamtam ba ki nongrep ha kitei ki thaiñ kidei kiba pynmih ia u shynrai uba bha tam ha ka pyrthei baroh kawei.
U MP bad u MLA kila kyntu ia u Symbud Myntri Rangbah uba khmih ruh iaka tnad PWD (R&B) ban bthah iaka ophis ba kan leh noh ia kaba donkam bad ban pynkhreh noh iaka Detail Project Report khnang ba yn lah ban pyniaid shaid shiad noh ia katei ka projek kaban pyniasoh iaka East Jaintia Hills bad ka West Jaintia Hills.
Pule lang ia kane: Lum u DyCM ia ka jingialang ki Heh Sorkar ban pynkhreh ia ka jingialang ka G20 ha Shillong
