Shillong, Naitung 01 : U MLA ka Nongpoh Bah Mayralborn Syiem, hynne ka sngi Nyngkong, ula leit buddien na u Myntri Rangbah ka Jylla Conrad K Sangma, halor ka jingdawa ban shna pynbha noh ia ka surok Nongpoh-Umden-Sonapur.
Ia une u MLA la synran da ki riew rangbah ka Ri-Bhoi District ba kynthup ia ki Nongialam Shnong ka thain Nongpoh bad Umden.
Haba iakren bad ki lad pathai khubor, u Bah Mayralborn ula pyntip ba ka jingiakynduh ia u Myntri Rangbah ka dei eh halor ka jingdawa ki paidbah ban maramot noh ia ka surok Nongpoh-Umden-Sonapur.
Ula pyntip ba ka jingmang tyngka ban maramot ia kane ka surok kan poi kumba T.52.98 klur.
“Ngi la kyntu ia u Myntri Rangbah ban kynthup iaka surok Nongpoh-Umden ka ba don 20 km haka thup ban phah shaka tnat DoNER khnang ban ioh pisa ban maramot kham kloi ia kane ka surok” ong u Bah Marylborn.
Haba kylli u Bah Marylborn ula ong, “Naka liang u Myntri Rangbah ka Jylla ula kular ba kane ka surok kan long kawei na kiba kam ba buh hakhmat eh, bad ban shim khia na ka bynta ka jingmyntoi ki paidbah.”
