Shillong, Naiwieng 16: Ki bahaïng hasem jong u bah Cheristerfield Thangkhiew (Bam kwai ha u Dwar u Blei) ha ryngkat Ka Sur Ka Bri U Hynniewtrep (KSKBUH) hynne ka sngi palei, ki la leit iakynduh ia u Superintendent of Police (SP) ka East Khasi Hills ban buddien iaka ejahar ba la ujor pyrshah ia ki pulit kiba donkti ban siat iap ia u Bah Cherist.
Haba kren sha ki lad pathai khubor u nongialam ka KSKBUH bah Donboklang Kharlyngdoh u la ong ba ka kynhun naduh ka sngi ba nyngkong ka la dawa ia ka hok hynrei haduh mynta ym shym la ioh.
U bah Donbok u la ong ba ka KSKBUH bad ki bahaïng u bah Cheristerfield Thangkhiew (Bam kwai ha u Dwar u Blei) ki dawa ban pynshitom ia kiba la shim jubor ia ka jingim u bah Cheristerfield hynrei haduh ban da dep ia ka kaiphod ruh u MyntriRrangbah ka jylla um shym la bat ia ka jingkren lade.
“Hadien ba ka sorkar ka la sei madan ia ka kaiphod jingtohkit ba la khlieh da u Justice Vaiphei, mynta ngi dawa ba ka sorkar kadei ban pynbna paidbah noh ia kata ka jubab ba la ioh hadien ba ka la pan jingshai na ka kynhun Tactical Team-1” la ong u bah Donbok.
Naka liang u bah Thomas Passah u la ong ba ka sorkar kan shim por sa katno ban ai ia ka hok sha ki bahaïng hasem jong u bah Cheristerfield.
U bah Thomas u la ong ba ka jingpyrshang jong ka sorkar ban pynslem ka kdew ba don eiei sha lyndet namar ba ha ka jingshisha lada ym don eiei ka sorkar kadei ban aiti sha ka ïing Kashari ba kan bishar ban leh ia kaba donkam.
