Shillong, Nailur 27 : Ka Synjuk ki Seng Samla Shnong (SSSS) hynne ka sngi Balang kala leit ai khublei iaka Executive Committee jong ka KHADC halor ka jingkynthup lang ia ki Seng Samla Shnong bad ki Seng Longkmie ha ka Elaka Administration Second Amendment Bill, 2023 kaba ai jingithuh pura noh ia ki lyngba ki kyndon aiñ ban iatrei ryngkat bad ki Dorbar Shnong.
Ka seng SSSS hapoh ka jingialam u Chairman Bah Vanshan Buhphang kila aiti ha u CEM bah Pyniaid Sing Syiem bad u Deputy CEM bah PN Syiem ia ka riti treikam jong ka seng bad ia ki jingai jingmut ban pynkhlain shuh shuh ia ka rukom treikam jong ki shnong ki thaw.
“Ngi pynpaw ka jingsngewnguh ia kane ka EC kaba mynta hapoh ka jingialam jong u Bah Pyniaid Syiem namar kane kadei ka mat kaba ka Synjuk ki Seng Samla Shnong kila angnud la slem bha, namar ngi dei shi bynta jong ka synshar shnong synshar thaw ryngkat ki dorbar shnong na bynta ka bha ka miat bad ka shongshngain ha ki shnong ki thaw,” ong u Bah Vanshan Buhphang haba iakren bad ki nongthoh khubor.
Ula ong, ka SSSS naduh u snem 2011 kala ap khmih lynti ban ioh iaka jingithuh pura hynrei ka Village Administration Bill kala shu sahkut kumto hadien ba kila mih bun ki jingpyrshah.
“Ngi ai ka jingiaroh ia ka EC ba kila nud ban shim ia kane ka sienjam. Ngi tip ba kan ym pat long 100 na ka 100 ba ka la biang lut hynrei dang donkam ban pynbha shuh shuh ia kane ka ain na kane kaba mynta, namar kane hi kan aibor ia ki seng samla shnong ba kin lah ban treikam khambha shuh shuh,” ong u Chairman ka SSSS.
