Ki paradoh parasnam ruh kiba pynbudnam kin hap panmap hapoh 24 kynta : Titos
Sohra, Jylliew 10 : Ki paid nongshongshnong ka Sohra ha ka sngi Ba-ar, kila leh burom khatduh ia u nong Indore ba shah pyniap ha Sohrau Raja Raghuvanshi haba aipor ruh iaki National Media ba kin dei ban panmap paidbah hapoh ka 24 kynta namar ka jingpynbudnam sniew ia ki nong Sohra, ka Sohra bad ka Jylla baroh kawei.
Ki paidbah kila byrngem ba lada ki National Media kim pan map hapoh ka 24 kynta, kin shim ia ka lynti ban ujor sha ka Ain.
Ka Hima Sohra ryngkat ki khun ki hajar ka Hima, kila pynlong ia ka jingialang thang mombiti ban pynpaw ia ka dak ka jing sngewlem ia u Raja Raghuvanshi, bad pyndem ruh ha ki jingduwai haba pynpaw ia ka jingsngewlem ia ka Iing u Raja, uba la shah pyniap hala ka jong ka kurim ka Sonam Raghuvanshi bad lai ngut ki briew jong ka, ha ka jingwan leh honeymoon ha Sohra myn ha ka 23 tarik Jymmang.
Da ki hajar ngut ki nongshongshnong ka Sohra kila iamih ryntih ban iashimbynta ha kane ka jingiathang mombiti.
Hashuwa kane, ki nongshongshnong ka Hima Sohra kila pynlong ruh ia ka jingia iaid paidbah ban pynrem ia kane ka jingjia bad kumjuh ruh ia ka jingshah pynbudnam sniew ka thain Sohra, ka Sorkar Jylla, ki Pulit ka Jylla bad ka Jylla baroh kawei.
Ia kane ka jingiaid paidbah la pynsdang napoh ka phyllaw jong ka Ophis u Syiem ka Hima Sohra bad la pynkut ha ka jingia lang thang mobiti ha Saitsohpen.
Ka jingsngew jong ki trai shnong, kala kylla na ka jingsngewsih ia kaei kaba jia bad ka jingbitar ia kaei kaba la shah kynnoh bad ki nongkren ha ka jingialang, kila pynrem jur ia ka jingpynsaphriang khubor lamler da ki katto katne ki lad pathai khubor ka Ri, ki nongkynthoh ha ki social media, kiba pyni ia ka Sohra bad ka Meghalaya kum ka jaka ka bym shngain lane ka jaka ba jyllei ki kam bymman.
“Ngi dawa ia ka jingpanmap ba khlem kyndon na baroh ki National Media bad ki briew ha Social Media kiba la pynbud nam sniew bad pynthohbria ia ka Sohra bad ia ki nongshongshnong jong ka. Lada ym panmap hapoh ka 24 kynta, ngim banse ban ujor da ki ejahar bad iaid tian bishar kat kum ka ain” pynbna u Nongaiktien ka Hima Sohra ha kane ka jingialang.
U MLA ka Sohra Bah Gavin Miguel Mylliem, uba la iashimbynta ha kine ki jingialang, ula iai ban ia ka jingsngew mong jong ki paidbah bad ka jingbitar ia ki nongpynbudnam. “Kane ka dei ka jingjia kaba sngewsih kaba la pynkhihwin bha ia ngi baroh. U Raja u dei u nongwankai ha ka jaka jong ngi. Ki paidbah ka Sohra kila pdiang ia u naduh ka mynsiem, bad kaei kaba jia ia u kam dei satia kaba phalang ia ka jinglong ka jaka. Ka long kaba jah burom ba ki National Media ki jied ban airong ia ka Sohra kum ka thain ba don jingma bha ha ka jaka ban ai ia ka khubor da ka jingkitkhlieh” ula ong.
U MDC bad CEM barim ka KHADC Bah Titosstarwell Chyne ruh ula iashimbynta ha kane ka jingiaid paidbah bad ka jingiathang mombiti bad ong, ba ym dei tang ha ki National Media hynrei wat ha ki paradoh parasnam ruh kila pynthoh bria, kila pynkynmaw ia u Thlen da kaba ong ba ka thain Sohra ka dei kaba bun ki menshohnoh.
“Kane ka ktah shibun ia ka jingsngew ka jong nga bad jong ngi baroh. Ta ka daw kane ka rally kan dei ka khubor ym tang ia ki briew ba nabar ka Jylla hynrei ia ki paradoh parasnam na kiwei ki thain kiba pynthohbria ia ngi” ula ong.
“Lada ngi la dawa ia ki National Media kiba pynthohbria ia ngi ba ki dei ban panmap, ngi dei ruh ban dawa ia ki paradoh parasnam kiba kynthoh ha ki social media ruh ba ki dei ban panmap hapoh 24 kynta lem kumta ngin ujor da ka ejahar. Ngi la tip ia ka kyrteng jong phi” ula bynrap.
Ki saw ngut ki suba nongpyniap, kynthup ka Sonam Raghuvanshi, kila don mynta ha ka kti ki Pulit bad yn sa rah tian bisahr ia ki hakhmat ka Iingkashari ha Shillong.
Ka khubor na Sohra ka long kaba shai-ai ka jingbishar ba hok ia u Raja, burom ia ka Meghalaya bad pynshitom ia kito kiba pynkylla khongpong ia ka jingshisha.
