Shillong, Rymphang 12 : Ka Meghalaya Veterinary Services Association (MVSA) kala pynrem jur ia ka jing leh tohmet jong ki shipai BSF ia u Doktor ka Animal Husbandry & Veterinary ka Muktapur bad rai ban dawa panmap da ka jingthoh na ki borkhmih ka BSF.
Ka Meghalaya Veterinary Services Association (MVSA) kala shim ia kane ka rai ha ka jingialang ba kyrkieh jong ka Central Executive Committee ba long hynne ka sngi Nyngkong.
Ka MVSA ka pynrem jur ia u Rajender Kumar bad ki paralok kiba dei ki shipai BSF na Lakroh Shiv Mandir, Hawai Tilla, West Jaintia Hills, kiba thombor ia u Officer ka AH &Veterinary ka Muktapur Veterinary Dispensary, Amlarem Dub Division Dr Seiboklang Buam.
Kane ka jingjia kala jia hynnin ka sngi U Blei ha ka por 12:05 baje mynsngi katba une u doktor u dang leit khwai ha ka wah ba marjan ka Shnong. Une u doktor ula shah bat ha ki BSF bad shah phah law lyngkhuid ki jain nalor ka jingshah byrngem siat iap ha kine ki BSF.
Ia kane ka kam la lap da ki longkmie ka thain, kiba la leit ban tuklar bad pyllait ia une u doktor na ka kti ki BSF.
U President bad General Secretary ka MVSA ki pyntip ba ka Synjuk kala rai ban pyntip ia kane ka jingjia sha ki bor ba halor jong ki shipai BSF ka Meghalaya Frontier, Headquarter haba dawa ruh ba dei ban panmap da ka jingthoh na kine ki bor khmih nalor ka jingkular ba kum kine ki jingjia kim dei ban jia biang hadien habud.
