Shillong, Jymmang 03: U Myntri Khynnah ka kam pohiing ka Ri Nityanand Rai, yn sa wan plie paidbah iaka Land Port ha Dawki lashai ka sngi Palei, ban kyntiew iaka kam khaii pateng hapdeng ka ri India bad ka ri Bangladesh.
La ioh jingtip ba u Myntri Khynnah yn plie ia katei ka kad khaïï ha ryngkat ka jingdonlang u Symbud Myntri Rangbah ka jylla u Bah Sniawbhalang Dhar, u High Commissioner ka India sha Bangladesh bad kiwei kiwei ki heh sorkar.
Ka Dawki Land Port ka dei ka project kaba kongsan jong ka sorkar India, kaba ka jingthmu kaba hakhmat eh ka long ban kyntiew iaka khaïï pateng hapdeng ka ri India bad Bangladesh.
Kane ka Land Port kaba don ha Dawki kadei kaba hap hapoh ka West Jantia Hills, kaba jngai 55 Km naka District Headquarter, Jowai bad kaba jngai 84 Km naka nongbah Shillong, kaba dei ka nongbah jong ka jylla Meghalaya bad ka jaka jngohkai kaba pawnam ha ka ri India.
Katba ka Land Port jongka ri Bangladesh ka don ha Tamabil, kaba hap ha ka Sylhet District.
Ka Land Port Dawki ka long kaba kongsan namar ba kadei ka shlem ha ka khaii bad ha ka kit ka bah hapdeng ka ri India bad Bangladesh, ban plie lad iaka jingkit ia ki mar ki mata, ki briew bad ki kali.
Ia ka jingtei iaka Land Port Dawki la ai jingmynjur da ka High Level Empowered Committee (HLEC) jongka Ministry of Home Affairs ha ka 4 tarik u Rymphang 2016 bad latei ia ka Land Port ha ka jaka kaba don 23 akar.
