Shillong, Risaw 07 : U Myntri Rangbah ka Jylla Conrad K Sangma un hiar jurip lashai ka sngi Ba-ar ia ki jaka kiba shlei um na ka jingther u slap ha Ri-lum Garo ban peitthuh ia ka jinglong jingman bad iakynduh ia ki lanot bad ki nongshongshnong ha ki jaka rieh bala buh da ka Sorkar.
U Myntri Rangbah un hiar jurip ha ka thain Dalu, West Garo Hills, ha Atisia Songmong ha South Garo Hills bad ki jaka ba marjan nalor un iakynduh ruh ia ki briew kiba sah ha ki jaka ai jingiarap ha kine ki thain.
Nalor kane, un leit iakynduh ruh ia ki bahaiing hasem jong ki briew kiba iap ha kane ka jinglynshop ki bor ka mariang, kiba dei na West bad South Garo Hills.
Ki Myntri Sorkar, MLA bad ki Heh Ophisar ka Sorkar kin synran ia u Myntri Rangbah ha kane ka jinghiar jurip ia ki shnong ba shah ktah ha ka jingther u slap.
Hadien kane, un sa lum ia ka jingialang bishar kam bad ki bor pyniaid District ka West bad South Garo Hills ban pan jingkhein ia ki jingjulor baroh.
Haba pynpaw ia ka jingsngewlem ia kito kiba duh noh iala ki bahaiing, ki paralok, u Myntri Rangbah ula bthah ia ki bor pyniaid District ba kin pyllait noh mardor ia ka song jingiarap pisa sha ki bahaiing jong ki briew kiba iap.
Nalor kane, ula kular ruh ban ai ia baroh ki song jingiarap sha ki briew kiba shah ktah.
Ha kajuh ka por, u Myntri Rangbah u pyntip ba baroh ki kam maramot ia ki jingjulor kila iaid shaid shaid mynta bad pynthikna ba ki lanot kin sa ioh ia baroh ki lad jingiarap na ka Sorkar.
Haduh 17 ngut ki briew kila iap ha kine ki 4 sngi na ka jingther u slap ha Ri-lum Garo, kiba dei na ki 4 napdeng ki 5 tylli ki District ka thain-ka West Garo Hills South Garo Hills, North Garo Hills bad East Garo Hills.
Haduh 17000 ngut ki briew na ka thain kila don mynta ha ki jaka ai jingiarap jong ka Sorkar bad tang ha ka West Garo Hills marwei, kala don haduh 68 tylli ki jaka ai jingiarap.
