Shillong, Naiwieng 02 : U Symbud Myntri Rangbah ka Jylla Bah Prestone Tynsong, un iakynduh lashai ka sngi palei ia ki Nongialam jong ki san Sengbhalang ba iakhih “Save Hynniewtrep Mission” haba banjur ba ka jingkhang jong ka Secretariat ka plie beit ban iakren halor kino kino ki kam ba ktah ia ka Jylla.
“Lashai ngan sa iakynduh ia ki bad nga ban jur ba ka jingkhang jong ngi ka plie beit ha Secretariat” ong u Bah Prestone haba iakren bad ki nongthoh khubor.
Kane ka jingkren u Symbud Myntri Rangbah kala mih shisngi hadien ba ki Kynhun Sengbhalang kila pynlong ia ka jingiaid paidbah ba kynsan kynsan sha Secretariat bad pynkhein ia ka kyndon 144 CrPC ban dawa ia ka Sorkar Jylla ba kan pynur long ia ki khyndai tylli ki mat jingdawa ba kynthup ia ka jingpyntreikam ia ka Inner Line Permit (ILP) hapoh ka Jylla.
Kila pynpaw ruh ba ka long ka jingpynsyrwa kai ia ka por ban iakynduh ia u Myntri kam Pohing ma Lahkmen Rymbui namar ba um lah ban ai ia kano kano ka jingkular halor ki mat jingdawa.
“Ngi wan hangne ban iakren ia ki ishu bad nga kyrmen ba ngin ioh ia ka jingiakren kaba tei bad ki Sengbhalang” ong u Bah Prestone haba bynrap ba un sa kynthoh halor ka ishu ILP hadien ka jingialang lashai ka sngi.
Ki san tylli ki Sengbhalang ba kynthup ia ka HYC, HANM, JSM, EJNC bad ka CORP kila dawa ban pynkynriah ia ka Them Metor na Them Iew Mawlong, ban bishar thymmai ia ka MoU pynbeit pud bad ka Assam, ban pynshitom ia ki Pulit ba donkti ha kaba siat iap ia u Nongialam barim ka HNLC Bah Cheristerfield Thangkhiew, ban pynshitom ia ki briew kiba donkti ha ki kam bamsap, ban weng ia ka jingeh halor ka jingbym iohkam iohjam, ban pyndam noh ia ka Gaming Act bad kiwei kiwei.
Halor ka jingpynkhein ia ka kyndon 144 CrPC, u Symbud Myntri Rangbah ula ong “Nga kyrpad ba baroh ki dei ban burom ia ka ain bad haba ngi iakren halor ka ain, ki bor ba dei ban pyntreikam ki hap ban shim ia ka sienjam ba donkam” haba pynpaw “Ngin pyrshang katba lah ban pynthikna ia ka jingtehlakam ia ka shongsuk shongshngain bad ba ym dei ban don mano mano ruh kiba shim ia ka rai hala ki jong ki kti”.
Ha kajuh ka por, u Bah Prestone ula kyntait ia ka jingkynnoh jong ka Liang Pyrshah ba ka shongsuk shongshngain kala sniew da kaba ong ba ki Pulit kila kem ia ki briew kiba donkti ban shoh ia ki nongleit nongwan ha ka rally jong ka FKJGP.
Haba pynpaw ba ki Nongialam Sengbhalang ki dei ki nongshongshnong ba don ka jingkitkhlieh kiba shakri ruh ia ki paidbah ka Jylla, u Bah Prestone ula ong “Nga kyrpad ia baroh ba kin burom ia ka ain. Ngi dei ban iaid kat kum ki rule kiba la treikam ha ka Jylla baroh kawei”.
Halor ka jingkynnoh ba ka Sorkar ka jem palat ha kaban tehlakam ia ka huri hura ha Jylla, u Bah Prestonr ula ong ba ka Sorkar MDA ka dei ka Sorkar kaba lah ban iakynduh ia ki paidbah jong ka Jylla.
