Kohima, Risaw 08: Ka kynhun ki riew wad bniah napoh Fazl Ali College ha Mokokchung kila lapdien ia ki jait dohkha kiba thymmai na ki bynta jong ka wah Dikhow hapoh Nagaland.
Kane ka kynhun wad bniah hapoh ka jingialam jong u Limaakum na ka Department Zoology hapoh Fazl Ali College kila ai kyrteng ia kine ki jait dohkha kiba dang lap thymmai da ki Pethia dikhuensis.
Ia ki jingbatai bniah kiba iadei bad kane ka jinglapdien la pyllait lyngba ka international journal for taxonomic studies—Zootaxa.
U Limaakum ula ong ruh ba kane ka projek ka jong ki ka dang iai bteng ha kaba kila lapdien shuh shuh ia kiwei pat ki jait dohkha kiba thymmai bad ba ki dang ap ia ka jingmih lyngba jong kane ka jingwad bniah.
Ia kine ki jait dohkha Pethia dikhuensis haduh mynta hi la tip ba ki don tang hapoh ka wah Dikhu, ka shnat wah jong ka Brahmaputra, kaba hap hapoh Mokochung district ka Nagaland.
Kine ki jait dohkha ki long kiba pher shibun napdeng kiwei pat ki jait dohkha namar ki dohkha shynrang ki don ia ki shnet kiba rong soh ha ka met jong ki.Ia kine ki jait dohkha la pyndonkam ruh da ki trai shnong ha kaba bam ia ki don ruh ia ka dor namar ka jingkhring jong ka rong kaba ki don.
Kine ki genus Pethia ki dei ki jait dohkha kiba rit kata kiba don ka jingheh kaba tang kumba 5-8 cm ia kiba ju khot ki ‘barbs’. Ia kine ki jait dohkha la shem ruh ha ki bynta jong ka ka Indian subcontinent bad hapoh Myanmar.
