Gangtok, Jylliew 1: Ka jingther u lap bah ba jur, kala wanrah ia ka jingtwa khyndew kiba shyrkhei bha ha kylleng ki jaka jong ka jylla Sikkim kaba la pynlong ia 1,500 ngut ki nong jngohkai pyrthei ban sahkut namar ka jingdkut ne twa jong ki surok ha North Sikkim.
Ka jinglong jingman ka dang ima bad shyrkhei namar ba wat ka kynhun nongpyllait im ruh kila shah khanglad namar ka jingther jong u slap ba khlem sangeh bad kaba la pynlong ruh ia ka wah Teesta ba kan kiew ka um kaba la shim ruh ia ka jingim jong u wei u briew bad kumba phra ngut ki tourist ki dang jah hadien ba kawei ka kali kala ngam ha katei ka wah ha ka sngi Palei.
Ki bor ba dei khmih jong ka District Disaster Management Authority (DDMA) kila pynmih ka jingmaham ha ka sngi Saitjain da ka India Meteorological Department (IMD) ha kaba iadei bad ka jingma na ka jingshlei um, ka jingtwa khyndew ha Mangan, Gyalshing bad ha Soreng districts.
Ka jingjia kaba sngew shyrkhei bha kadei ka jingjia kaba la jia ha ka sngi Palei ha Mangan district ha kaba kawei ka kali kaba kit ia 11 ngut ki tourist kala syntuid na surok bad ngam ha ka wah Teesta River kaba jliew kumba 1 hajar phut hajan Munsithang, ha ka surok ban leit na Lachen-Lachung.
Halor kane, la pyntikna ba u wei u briew u la khlad noh katba ar ngut kila mynsaw ha ka jingjia accident kaba shyrkhei bha. Na ka liang ka kynhun search and rescue kila pyrshang ban wad sa ia ki phra ngut kiba dang sah hynrei kila shah khang lad noh na ka daw jong ka jingjur palat u slap bad ka jingbteng ban kiew ka um ha ka wah Teesta, Bad ka liang ki heh ophisar kila pyntikna ba hap ban pynsangeh shwa ia kane ka jingwad namar ba ka jinglong jingman ka long kaba i shyrkhei.
Na ki daw jong ka jingtwa ki khyndew shibun ki jaka kila shah ktah khamtam eh ha ki surok ka ban iasoh sha Chungthang sha Lachen bad sha Lachung, kaba la wanrah ia shibun ki tourist ban sahkut namar bym lait kali shuh. Ki bor pyniaid District jong ka Mangan District kila pyntikna ba haduh 112 ngut ki tourist kila shakut ha Lachen bad 1,350 ha Lachung kiba dang ap ban ioh leit phai suk.
Ka Wah Teesta kala heh bha namar ka jingkiew jong ka um bad ka tuid sha Chungthang, Mangan District. Ki dur na ka jaka jong ka dam barim jong ka Teesta Stage 3, kaba la shah pynjot ha ka por jong ka jingshlei um ha u snem 2023, ki pyni ia ki nongtrei kiba ialeh ban pynkhuid ia ka jaka trei katba ka um ka dang kiew.
Ki bor pyniaid ki kyntu ia ki nongshong shnong bad ki nongjngohkai pyrthei ban long kiba husiar bha bad kiba dang trei ruh ba kidei ban bishar bniah ia ka jingheh jong ka jingjulor bad ban pynsuk ia ki kam pyllait im bad ai jingiarap (rescue and relief operations) katba ka jinglong ka suinbneng ka ailad.
