Shillong, Jymmang 20: Kawei ka met iap jong u wei u briew kaba la sdang pyut bad ka bym lah ban ithuh, la lap ha ka step jong ka 18 tarik mynta u bnai Jymmang najan kawei ka khlaw kaba don harud surok National Highway-6 ha ki thain Kuliang, East Jaintia Hills district, Meghalaya.
Katkum ka kyrwoh khubor kaba la pyllait da u Superintendent of Police, East Jaintia Hills, u la ong ba ia kane ka met la lap da ki briew kiba wan na Mizoram ha ka por ba ki dang leit bar.
Kine ki briew kila leit ban khmih bad lap ba ia kane ka metiap la sop da kawei ka jain blanket. U iathuh ba mar mar kila pyntip noh sha ki Pulit ka Umkiang Police Patrol Post (PPP).
Ka kynhun pulit hapoh ka jingialam u SI P. Phawa kila leit ban jurip ia katei ka jaka, kaba jngai kumba 8 km na Kuliang PPP ha surok NH-6. La pynlong ia ka jingtohkit ha katei ka jaka, hynrei ym shym la lap ia ki dak jingmynsaw kiba lah ban iohi ha ka met namar ba ka met kala sdang pyut.
Ha ka jingpeit bniah la ithuh ba une u briew uba la iap u dei u shynrang bad uba la don ha ka rta kumba 35 ne 40 snem bad uba don kumba 5.5 ka jingjrong.
