Shillong, Nailar 21: Ka Kynhun wadbniah ba 3 ngut ki dkhot, bala thung da ka Sorkar, kala lap ba ki nong Bangladesh kila prong tuh sha ki shnong khappud ka South West Khasi Hills (SWKH) na ki jaka ba khyllem ne pra ki jingker sainar.
Kane ka kynhun ka kynthup ia u nongaibuit ka Sorkar Bah Himalaya M Shangpliang, u MLA ka Mendipathar Marthon J Sangma bad u Bah Kitborlang Nongrem uba dei u Vice Chairman.
Ia kane ka kynhun la phah da u Myntri Rangbah ka Jylla Conrad K Sangma bad u Symbud Myntri Rangbah ba khmih ia ki kam pohiing (Police) Bah Prestone Tynsong, ba kin wad bniah halor ka jingwan rung tuh bad pyntriem ki runar Bangladesh dang shen ha ki shnong khappud ka SWKH.
Kane ka jingphah wadbniah ka dei ruh hadien ka jingioh pdiang ia ka shithi bala phah da ki nongshongshnong ka thain Khonjoy bad Maheshkhola, kiba la pynpaw ia ka jingshong syier namar ki kam bymman jong ki runar na Bangladesh.
Kane ka kynhun ka Sorkar kala leit iakynduh ia ki paidbah ki lai tylliki Shnong ba kynthup ia ka Khonjoy B, Rongdanggai bad ka Maheskhola bad la pynlong ruh ia ka jingalang ban lum jingtip ia ki jingeh ba ki paid nongshongshnong ka thain ki iakynduh.
Ki Nongialam Shnong jong kine ki lai shnong kila aiti da ka dorkhas sha u Myntri Rangbah lyngba kane ka kynhun, kaba pynsngew ia ki jingdonkam jong ki paidbah kiba shong ba sah ha ki jaka khappud.
Haba kren bad ki lad pathai khubor, u Marthon J Sangma ula ong “Ngi la ioh ban iakynduh iaki paidbah ki lai shnong kiba shan ktah na ka jingwan pyntriem ki runar Bangladesh. Ngi la ioh shibun ki jingeh halor kane ka jingjia bad ruh iaki jingeh kaba ki paidbah ka thain ki iakynduh”.
“Ki paidbah kila pyntip ba watla ki jingker sainar kila don ha shilynter ka khappud ha ka thain hynrei ki don ki bynta jong ka jingker kiba la khyllem na ka daw jong ka jingjur u slap” ula ong.
Une u MLA ula pyntip ba kumba long mynta, ki paidbah kim da don than shuh ia ka jingsheptieng ne ka jingsyier namar ba ki Pulit kila pynkhlain ia ka jingpahara ha ka thain ryngkat ka jingiatreilang bad ki shipai BSF.
U Bah Himalaya ula iathuh ba ka kynhun kala ioh jingtip na ki paidbah ka shnong Maheskhola, ba ki nong Bangladesh kila iaid bad rung sha India lyngba ka Maheskhola na ki jaka ker sainar shiah kiba la julor bad pra bad na ka liang ki paidbah kila kyntu ba dei ban peit bad pynbha noh ia kine ki jingker sainar.
“Ka jingioh lad ki nongBangladesh ban rung tuh ka buh ia ka jingma ia ki paidbah nongshong shnong khamtam eh ia ki khynthei bad ki longkmie” ong u Bah Shangpliang haba bynrap “Ngi la dep ban iakren bad u SP ka SWKH Bah B Jyrwa uba la pyntip ba u dang pan shuh shuh ia ki bor pahara ban phah pahara ha kane ka dong ka thain”.
U Bah Shangpliang u la pyntip ba Kynhun kan sa aiti da ka kaiphod sha u Myntri Rangbah ka Jylla bad u Symbyd Myntri Rangbah ba khmih ia ki kam pohiing (Police) halor ki jingshem na kane ka jingwan jurip ia ka thain.
 na ki jaka ba khyllem ne pra ki jingker sainar.){kind=link}