Nongstoiñ, Risaw 24: Namar ka jingud jingnam jong ki paidbah ka thaiñ Ri Muliang, ka KSU Ri Muliang Circle, ha ka sngi palei ka la leit ban jurip kyndit ïa ka Nonglang PHC bad lap ba kane ka jaka sumar jong ka Sorkar ka don hapdeng shibun ki jingduna.
Kane ka seng ha ka jingïalam u President samla Biangboy Sangriang bad Secretary samla Dominic Kharmaw, ka la shim ia kane ka sienjam halor ka jingujor ki paid nongpang ba kim ju ioh dawai satia na kane ka jaka sumar ka Sorkar namar ka jingbym don u Pharmacist bad ka dawai ba ki ioh ka dei kaba shu ai hi da ki Nos.
Ka KSU kala shem ba kane ka jingujor ka dei kaba shisha bad kyntu ia ki bor ba dei khmih ba kin leh eiei noh mardor.
Ha kajuh ka por, ka KSU kala shem ruh ba kane ka PHC kam lah pynbiang satia ia ki jingthiah jong ki nongpang bad bun ki nongpang kila hap thiah ha ki jaka buh mar.
Ka KSU kala pyntip ba shen kan sa leit buh da ka jingthoh sha u DMHO ban dawa pynbiang noh ia baroh ki jingdonkam ha katei ka PHC.
