Nongstoin, Risaw 17: Ka Khasi Student Union (KSU) Lyngngam Hynnengbrei Area Unit kala leit jurip ia ka Shallang PHC bad shem ba kane ka jaka sumar ka Sorkar kala treikam khlem u doktor mynta la kumba 2 bnai.
Kane ka Seng kala pynlong ia kane ka jingjurip hadien ki jingujor na ki paidbah nongshong shnong halor ka jingbym don doktor ha katei ka PHC haba ki leit wad jingsumar.
Nalor ka jingbym don u doktor, ka seng ka la lap ruh ba katei ka PHC ka dang duna ha kiba bun ki liang khamtam ha kaba iadei bad ki jingduna ki kamra thiah ia ki nongpang, ka jingbymbiang ki dawai dashin bad kiwei kiwei kaba la nang pyndkhoh shuh shuh ia ka rukom treikam jong katei ka PHC.
Halor kane, ka KSU Hynnengvrei Area Unit hapoh ka jingialam jong u president, samla Anselm Ryntong, mynta ka sngi ka 17 tarik u Risaw 2023 ki la leit ban iakynduh ia ka DM&HO WKHD ban ujor halor ka jingbym don Doctor ha kane ka PHC bad halor ka jingbymbiang ki lad ai jingsumar.
Namar kata, ka Seng ka la dawa ruh na ka tnad ka koit ka khiah jong ka sorkar Jylla bad kumjuh na u MLA ka Mawshynrut Constituency Bah Methodios Dkhar ban phai khmat lem sha katei ka PHC kaba ju ai jingshakri ia kiba bun phew tylli ki shnong ka Shallang C&RD Block hapoh Mawshynrut.
