Shillong, Nailur 09 : Ka IIT kala lap ba dei ka jingkhia palat jong u Dome kaba lam sha ka jingkhyllem une u jingtei ha ka Iingdorbar Thaw Ain ba thymmai ka Jylla.
Ka IIT kala shem ruh ba ka daw ka dei na ka jingbym don ka jingiatreilang hapdeng ki Agency ba dei tei ia kane ka Iingdorbar.
Kane ka long kat kum ka kaiphod jingtohkit jong ka IIT kaba la wanrah hapoh ka jingialang jong ka High Powered Committee ka Iingdorbar Thaw Ain.
Ka kaiphod ka ong ruh ba kiwei ki bynta jong ka jingtei ki long kat kum ka standard bad ka dei kaba khlain bor bad kaba shngain.
U Myntri Rangbah ka Jylla Conrad Kongkal Sangma ula pyntip ba jin ba ka don ka jingiatreilang bad dei bala pyntrei bha ia ka kam, kum kine ki jingjia kin ym jia satia.
Ka High Power Committee kala bthah ia ka Sorkar Jylla ba ka dei ban khot mardor ia ki kynhun kiba don bynta ha ka jingpynwan dur ia ka jingtrei bad ruh ki Contractor ban pan ia ka jingpynshai.
“Ka Sorkar kan sa khot ia ki Kynhun ban ai jingpynshai kat kum kane ka kaiphod. Ka Sorkar kala ai ruh ia ki jingmut iakaei kaba dei ban bud bad yn sa rah ia kane ha ka HPC ka ban sa shong jingialang hapoh ka shitaiew ne shiphew sngi” ong u Conrad.
Haba kylli la ka HPC kan pyniaid shakhmat iaka jingtei ia u Dome, u Conrad ula ong b aka kaiphod kala kren shai ba lada ka HPC ka rai ban jam shakhmat bad ka jingtei ia u dome, une u jingtei u dei ban long uba sting.
“Ka kaiphod ka dei ba dei ban bujli ia u dome da u steel tubular truss ba sop da ka CGI sheet. Kila ai jingmut ia kane kaba mut ba ka jingtei ka dang lah ban kynthup ia u dome hynrei u dei ban long uba sting haba ianujor bad ka 4.50 lak kg bala tei nyngkong” ula ong haba bynrap ba ka rai kan shong eh haka HPC.
Haba kylli la kan don ka jing tynrong ia ka jingbahkhlieh ha ki Agency bapher bapher, u Myntri Rangbah ula ong b aka Sorkar kan pan jingpynshai shuwa na ki hashuwa ban rai iakaei kaba dei ban leh hadien habud.
“Ngin hap ban pan jingpynshai balei ba kane ka jingtwa ka jia bad ngi hap ban sngap ia baroh arliang bad shisien ba ngi la dep sngap, ngin sa shim ia ka rai ha baroh ki bynta kynthup ia ka jinglut jingsep na ka jingjulor” ula bynrap.
