Shillong, Iaiong 25 : Ka Hynniewtrep Youth Council hynne ka sngi Palei kala leit ban jurip ia ka jaka kaba don sha lyndet ka Them Metor bad lap ba ki bar jylla kila shna 80 tylli ki iing be-aiñ ha ka jaka kaba hap ha ka jingkhmih jong ka Shillong Cantonment Board.
Ha kane ka jingjurip, ka HYC kala lap ba kitei ki jaka sah ki dei kiba la shna be-aiñ da ki bar jylla bad kala kylla syndon kum ka slum bad ka ktem jong ka jingdie ia ki jingdih kiba sniew. La kynnoh ba kine ki briew kila shna ia kine ki iing khlem da ioh jingbit.
U President ka HYC u Bah Roy Kupar Synrem, ula ong ba kine ki briew kiba sah be-aiñ ha kane ka jaka kila kam ba kila sah da ki phew snem hynrei kaba lyngngoh ka long ba kila shu tan be-aiñ ia ka bording elektrik bad ka MeECL kam shym la leh eiei ia kine kiba sah be-aiñ khlem da siew ia ka bai bording.
Ula buh jingkylli ia ka Sorkar jylla, Shillong Cantonment Board bad ia ka MeECL ba kila leh aiu halor kine ki longiing bad balei ki leh matlah ia kine ki briew kiba sah be-aiñ ha kane ka jaka.
Ula iathuh ba ha ka por ba ka seng kala leit jurip ia kane ka jaka, kila don 4 ne 5 ngut kiba ju khaii drok, kila phet krad na katei ka jaka.
U President ka HYC ula ong, ba katei ka jaka, ka lah ban dei ka ktem die drok bad ka ktem jong ki kam sniew kiba ju jia ha kylleng ki jaka.
U iathuh ba ka HYC kala ioh jingtip ia ka kyrteng jong ki nongdie drok bad kan sa buddien ban pyntikna ba kine ki briew kiba khaii drok kim dei ban sah ha kane ka jaka.
Ka HYC kala ioh jingtip ruh ba ka jingiohlad ki bar jylla ban sah ha katei ka jaka, kadei na ka jingaiwai ki khar metor hynrei naduh ba don ka jingiakhih ha u snem 2018, kine ki khar Motor kila sangeh noh ban aiwai.
