Aiti ka FKJGP ia ka kaiphod sha ka Sorkar Jylla
Shillong, Risaw 03 : Ka Food Safety and Standards Authority of India (FSSAI) kala sei madan ia ka jingshem ba ki nongshongshnong jong ki 44 tylli ki Shnong ka Nongbah Shillong, kila pyndonkam ia ka umbam umdih ka bym shngain bad kaba don jingma ia ka koit ka khiah.
Ka FSSAI kala pynmih ia kane ka kaiphod hadien ka jingtohkit ia ki um nongmuna (water sample) bala lum da ka seng Federation of Khasi Jaintia & Garo People (FKJGP) na ki 46 tylli ki Shnong ka Nongbah Shillong myn ha ka 22 tarik Nailar. Ka FKJGP kala lum nongmuna ia ki um halor ka jingud jingnam ki nongshongshnong ba ki ioh ia ka umbam umdih kaba jaboh bad bym shngain.
Kat kum ka kaiphod ka FSSAI, tang ka Shnong Demthring bad ka Mawblei kiba ioh ia ka umbam umdih kaba shngain.
Ka kaiphod ka pyni ba kat kum ki test, ki um bala lum nongmuna na ki 44 tylli ki Shnong ki dei kiba don ia ki coliform bad E..coli, ba duna ka pH value, ba bun iron palat ia u pud, kaba pyni shai ruh ba kine ki um kim long satia kiba shngain ban duh kat kum ka FSSAI standard.
Ka FKJGP ka pynpaw ba ka jingshem ia ka jingduna ka pH value ha kine ki um bala lum nongmuna ki pyntip ba kine ki um ki dei kiba jur ka acid. Kat kum ka FSSAI standard, ka umbam umdi ka dei ban don ia ka pH value hapdeng 6.5 haduh 8.5. Kaba hapoh 6.5 ka dei kaba long acid.
Kala ong ba watla ka jingdon ka iron ka long kaba kongsan ia ka koit ka khiah, hynrei ka jingdon palat pud ka lah ban lam sha ki jingma, kata ka lah ban pynioh ia ka jingpang shini, hemochromatosis, pang kpoh, pyndap lyer ka kpoh, bad jingpang sniewdoh kaban lam sha ka jingring sti kloi.
La ong ruh ba nalor kane, ka lah ban pynsniew ia u liver, pancreas, bad klongsnam nalor kiwei kiwei.
Ka jingdon jong ki faecal coliform bad ka E Coli ha ka um ka lah ban lam sha ki jingpang Diarrhea, hemorrhagic colitis, hemolytic uremic syndrome, respiratory illness, pneumonia bad kiwei kiwei ki jingpang kum ka meningitis, septicemia, urinary tract, kaba lah ban shim ia ka jingim jong ki Khynnah rit bad ki tynmen.
U Bah Dundee ula ong ba u Myntri Rangbah ula iaroh ia ka sienjam kaba la shim da ka FKJGP kaba dei ka sien kaba nyngkong ban phah test ia ka um ha kylleng ki shnong ha ka nongbah Shillong bad ula pynpaw ruh ia ka jinglyngngoh ban tip ba ka umbam umdih kam long kaba shngain ban dih ban bam.
“Ngi la dep ban leh ia la ka bynta ban lum ia ki ka um ban phah test ha ka Food Safety Laboratory kaba la lap ia kane baroh bad ngi dawa ba ngi dei ban ioh ia ka umbam umdih kaba khuid namar ba ki paidbah kiba ioh ia ka um na ka PHE ki da siew ia ka pisa ym ba ki shu ioh ei” ong u President ka FKJGP.
Une u Nongialam ula ong, ba u Myntri Rangbah ula kular ban shimkhia ia kane ka jinglap jong ka seng halor ka jingbym shngain jong ka umbam umdih kaba ki paidbah ki ioh.
Ula ong ka umbam umdih kaba ioh ki paidbah kadei kaba don ia ki khniang bad lada ki paidbah ki ioh kum kane ka um kin ioh ia ki jingpang bad kane kan ktah ia ka koit ka khiah ka jong ki.
