Dawa pynsangeh mardor ia ka hukum thungkam
Shillong, Iaiong 30 : Ka Achik Conscious Holistically Integrated Krima (ACHIK) kala dawa ia ka Tnad Urban Affairs ka Jylla ba kan pynsangeh ia ka hukum thungkam ia ki briew ki bym dei ki Garo ha ka jaka jong ka bhah ki Garo.
Kane kala mih halor ka jingshem ba kane ka Tnad Sorkar kala thungkam ia ki briew ki bym dei naka Jaidbynriew Garo ha ki kam kiba lah mang thik tang ia ki Garo.
“Ngi pyrshah jur ia ka jingthungkam ia ki nongwadkam bym dei ki Garo ha ka jaka jong ki Nongwadkam Garo bad dawa ban pynsangeh noh ia ka hukum DUA(U)E/29/2015/242 Dated Shillong, ka 24th Iaiong, 2023,” ong ka General Secretary ka ACHIK Adv Bernita R Marak ha ka shithi bala phah sha u Director ka Tnad Urban Affairs Bah E Kharmalki.
Ka Marak kala kynnoh “Ka shithi kala kren shai ba ki kam ba lait ki dei kiba la mang thik tang ia ki Nongaplai kam Garo bad 13 tylli ki kyrteng jong ki nong aplai kam Garo lah dep ban phah sha ka Tnad ha ka shithi No. ORD.50/21(ST)/316-17 Dated Shillong, ka 14 Lber, 2022, ban leh ia kaba donkam na ka liang jong phi hynrei, phi shim ia ka lynti ban pynkhein ia ka ain bad thung ia ki bym dei ki Garo ha ka jaka bala mang jong ki Garo kat kum ka ain”.
Ka ACHIK kala dawa ruh ia u Director ban pynkylla noh ia ka sienjam ba ula shim bad ong “..kumjuh ruh namar ka jingialeh pyrshah iaka Iingkasahri da kane ka kam wat hapdeng ki hukum ka Iingkashari bad ka Policy jong ka Jylla bad ruh kum ka jingpan map ia ka Jaidbynriew Garo namar kane ka kam ba peitpoh ia ka Jaidbynriew”.
Ka Marak ha kane ka shithi kala byrngem ruh ban rah ia kane ka kam sha ki kyrdan kiba halor duh lada u Director um lah ban pynsangeh mardor ia kane ka jingthungkam be-ain.
