Shillong, K’lyngkot 23 : U Myntri Rangbah ka Jylla Conrad K Sangma, ha ka sngi Palei, ula lamkhmat ban thang bad pynkylla dpei ia u droks ba shongdor haduh T.53.86 klur bala ioh kurup na kylleng ki District ka Jylla.
Ia une u droks la thang ha ka atoskhana ba rhem jong ka kompani Star Cement Ltd kaba don ha Lumshnong, East Jaintia Hills District.
Kane ka jingthang ia u droks ka dei kaba la leh da ka High Level & District level Drugs Disposal Committee ka Tnad Meghalaya Police ha ka jingiadonlang ki Symbud Myntri Rangbah-Bah Prestone Tynsong, Bah Sniawbhalang Dhar, ka Myntri ka Koit ka Khiah Kong Ampareen Lyngdoh, ka DGP Kong Idashisha Nongrang bad kiwei kiwei ki heh ki hain ka Sorkar.
Kine ki droks kiba la thang ki dei jong ki case NDPS bala register ha ki 5 tylli ki District ka Jylla-ka East Khasi Hills, West Khasi Hills, Ri-Bhoi, West Jaintia Hills bad East Jaintia Hills District.
Kine ki droks ki kynthup ia u heroin ba T.23.98 klur, u ganja ba T.7.6 klur bad u methamphetamine ba T.21.3 klur.
Haba kren ha ka jingialang, u Myntri Rangbah ula ban biang sa shisien ia ka jingkut jingmut jong ka Sorkar ban pynduh jait ia u drok uba la pynjot ia ka jingim jong kiba bun ki samla ka Jylla.
Ula ong ba ka Sorkar lyngba ka Drug Reduction, Elimination, & Action Mission ne DREAM, kala ai ka jingkyrshan ia ki samla kiba iakhun ban pyllait noh ialade na u droks.
U Bah Prestone ula ai khublei ia ka Tnad Pulit bad kiwei ki tnad kiba don bynta lang haba kren ia ka jingtrei shitom jong ki. “Ki Pulit hapoh ka jingialam ka DGP, kila leh ia ka kam kaba khraw bha. Kane ka prokram ka dei ka nuksa ia ka jingiatrei shitom lang jong baroh ki kynhun ban pynduhjait ia u droks hapoh ka Jylla” ula ong.
Ka DGP kala kular ia ki paidbah ba kan don ka jingthang ia u droks haba shit haba shai haba bynrap “Baroh ki sienjam ban shem la leh hadien ba bud ia ka ain bad ia kine ki kam la buh jingthoh ban pynbiang ia ka jingkhein jingdiah”.
