Nongpoh, Nailar 13: Arsngi shwa ba ki bor ka Ri Bhoi District kin iasnohktilang ha kaban rakhe ia ka 77th Independence Day, katto katne ngut ki runar ki bym lah ban ithuh durkhmat ki la leit ban wiang ding ia ka dukan die dawai kaba don hajan jong ka madan NSCA Mini Stadium Pahamsyiem, ha kaba la pynkhreh na ka bynta ka jingrakhe ia ka Independence Day jong ka District Ri Bhoi.
Katkum ka khubor ba la iohlum, ki runar bym lah ban ithuh durkhmat ki la leit ban wiang ding da kaba synreit da ka umphniang petrol bad pyndonkam ruh ia ki bitor plastic ban thang ia ka dukan die dawai ba la dei trai da u Muneswar Singh kaba don ha Pahamsyiem, hynrei ka jingthmu jong ki runar kam shem la urlong namar ba ka ding kam shem la klang ne ioh ban bam ia katei ka dukan die dawai.
Na ka liang u trai kane ka dukan die dawai, u Muneshwar Singh, u la iathuh, ba u la mih na la ka dukan ha ka por 8 shiteng eiei janmiet jong ka 12 tarik u Nailar bad kam shem la don satia kano kano ka jingsuba ne ki dak ki shin ba kane ka jingjia kan wan jia, hynrei dei ha ka step jong ka 13 tarik Nailar haba ki nongtrei jong kane ka pharmacy ki la wan ban plie ia ka dukan ki la lap pynban ia ki dak shah thang jong kane ka dukan ha ryngkat ki bitor plastic bad ka jain ba la khleh umphniang perol hakhmat jong kane ka dukan.
U Muneshwar Singh, u la iathuh, ba um don kano kano ka jingsuba ia kiba thmu ban leh sniew ia u ne ka dukan die dawai ka jong u, hynrei halor kane ka jingjia u la ujor da ka ejehar ha Nongpoh Police Station da kaba angnud ruh ba ki pulit kin treishitom ban thwet ia kiba donkti ha kine ki kam runar bad ban pynlong ia ka jingtohkit kaba bniah.
Lah ban kdew ba dang ha u ne u snem 2023, kumba 10 tylli ki dukan die mar mata ki la shah thang bad ki ding kiba shyrkhei ki la bam duh ia ki mar ki mata bad ki jingdon jingem jong ki trai dukan hapoh ka sor Nongpoh ha kaba la donkam kyrkieh ia ka jingtohkit bad ka jingpeitngor kaba bniah ban lapdien ia kine ki runar bym lah ban ithuh durkhmat.
