Shillong, Nailur 17 : Uwei u khynnah 7 snem ka rta, la ong ba ula shu lait salit na ka tyrsim jong ki suba nongrahbor ha ka sngi Nyngkong, da ka jingkyntait ia ki jingkhroh jingkjor ba laiphew jait ba un rung hapoh ka kali.
Kat kum ka jingiathuh une u Khynnah, ha katei ka sngi por 5 baje janmiet, arngut ki briew kiba shong hapoh ka kali rong iong, kila khot ia u ba un kiew hapoh ka kali da kaba khroh ba u Kpa ruh u don hapoh ka kali. Kane kala jia ha ka por ba une u khynnah u dang iaid lynti ban leit sha Iing.
La ong ba une u Khynnah namar ka jingiphylla ia kine ki briew, ula jubab da kaba ong “I Pa I leit otphlang shalum haba mareh arted arted sha Iing”.
Mar kumta hi, une u Khynnah ula pyntip ia kane ka jingjia sha ki bahaiing bad iathuh ruh ia u Kpa ia kaei kaba jia baroh.
Haba iakren bad u Kpa jong une u Khynnah, ula iathuh ba ha kane ka sngi hadien ba u wan bylla, u Khun ha ka jingiadon lang I Kiew, ula iathuh ia kaei kaba jia da kaba ong,”Pa mynne ka don kawei ka kali rong iong kaba shong arngut ki briew, kila khot ianga ale bah bah hangne i pa jong phi ruh i don lang hapoh. Hynrei nga la jubab ba i pa i leit ot phlang shalum bad nga la phet noh wut sha iing.”
U iathuh ba kane ka jingjia kala pyntieng pynsyier bad pynpar niangkhriat ruh ia ka iing baroh kawei khamtam ba ki dang mih khubor ki jingjia ba triem kiba la jia sha kiwei ki shnong.
U Rangbah Shnong ka Lad Mawreng Bah C Kurbah u iathuh ba hadien ka jingsaphriang ki khubor halor katei ka jingjia, kum u Nongialam Shnong ula wad jingtip bad leit iakynduh ia ki Kmie Kpa jong une u Khynnah ban pynthikna. U iathuh ba ki Pulit ruh kila wan ban kylli pyrthew bad ban tohkit.
U Bah Kurbah ula pynpaw ia ka jingsngewkhia kaba jur ba ki kam pyntriem ki runar kila nang shyrkhei shyrkhei katba nang iaid ki sngi bad kyntu ia ki nongshongshnong ba kin phikir bha iala ki jong ki khun ki kti bad ban ia peitngor bha khnang ban lah ban iohkem ia kum kitei ki briew kiba thmu ban leh kam sniew hapoh shnong.
Ha kajuh ka por, ula kyntu ruh ia ki bor Sorkar ba kan ai noh da ka skhim sha ki shnong nongkyndong ba kin pyndait ia ki kor CCTV ha man ki jaka rung jaka mih jong ki Shnong ki thaw khnang ba kan pynsuk pat ia ki bor ka ain ban iohksai ia ki briew kiba thmu leh ia kino kino ki kam sniew.
