Shillong, Risaw 17: Ka Seng Samla Mawiong Umjapung ha ka sngi Saitjain ka 15 tarik u Risaw, ka la pynlong ia ka Mawiong Umjapung Youth Program 2022 kaba ki la sdang naduh mynstep da kaba pynkhuid ia ka Dong Nengnong C, bud sa ka jingpynkup burom ia kiba pass SSLC bad HSSLC ha Indoor Sports Hall, Mawiong Umjapung.
Ha kane ka sngi ki la pynlong ruh ia ka awareness program halor u drok, kiad bad HIV AIDS bad khatduh ki la pynkut ia ka prorkram da ka jam session ha kane ka juh ka hall.
Ha kane ka prokram la ia don lang u bah PT Sawkmie, MLA ka Mawlai Konstitwensi kum u kongsan, bah Teiborlang Pathaw, MDC ka thain kum u symbud kongsan ha ka jingdon ryngkat u rangbah shnong bah Anthony Kharkongngor, bah Sanbok Diengdoh, president ka Seng Samla Mawiong Umjapung, ki khynnah skul bad kiwei kiwei.
Haba ai jingkren u Bah PT Sawkmie u pynpaw ba u sngew pangmet, pangnud, pang mynsiem ban iohi ia ka jinglong jingman ka Indoor Sports Hall kaba u la wanrah ha ka por jong u namar ba ka jingbym biang ka rukom sumar sukher bha ia ka.
Haba donkam eiei, ha ka jingshisha ki la dei ban pyntip sha nga khnang ba un ioh leh ia kaba donkam, ong u bah Sawkmie.
U la kren ruh halor ka um ba kum u nongmihkhmat u la pyrshang katba lah bad u la lah ban pynioh 24 klur tyngka na ka tnad PHE ban sam bad pynbiang um ia ka shong Mawiong Umjapung, hynrei ka shong pat ha ka shnong ban pdiang bad ban ym pdiang, kum u MLA um don eiei ban kynthoh halor kane ka bynta.
Haba kren halor ki samla pule u MLA u ong ba ki donkam ban trei shitom ban pynurlong ia ki thong jong ki, tang ka jingpynshitom kaban pynurlong ia ki ba kin ioh ia ka lawei baphyrnai ha ka jingim jong ki bad kane ka dei ruh ka jingangnud jong ki kmie ki kpa.
U kyntu ia ki khynnah ba kim dei ban pynsepei ia ka spah ka phew ki kmie ki kpa. U kren ruh sha ki ba kim dei ban shim ia ka rai bakla haba ia dei bad u drok bad buh jingkylli halade, hato da dih drok ka pynsngewbha ne em ia ki kmie ki kpa, kiew ne em ha ka jingpule bad bun kiwei ki daw.
Hashuwa kane la ioh ruh ia ka jingkren na u bah Teiborlang uba la kren sha ki samla pule ba kane ka jingpynkup burom ka dang dei tang ka jingsdang na ka bynta jong ki, hadien kane ka dangbun shuh shuh ki jingtynjuh kiba ki hap ban iakhun ha ka jingpule jong ki.
Halor u drok bad jingdih basniew u bah Teibor u ong haba don ka mon lait beit na kine ki jingdih basniew kiba pynjot ia ka jingim bad ka lawei jong ki.
Ha kane ka sngi u MLA bad u MDC ki la nohsynniang sha ka Seng Samla Mawiong Umjapung da ka song pisa, kum shi bynta ban ia don bynta lang ha kane ka prokram jong ki.
