Imphal, Naitung 20 :Ia ka jingwad na ka bynta ki lanot twa khyndew ki ba dang jah rngai ha ha Tupul ka ba hapoh Noney district ka Manipur yn pynkut noh mynta ka jan miet.
Ia kane la shim rai ha ka jingialang jong baroh ki kynhun ki ba iadon bynta ha kane ka jingwad ia ka ba la khot pynlong da ki bor pyniaid ka district hynnin ka sngi ba Ar. Na ki 79 ngut ki briew ki ba don ha katei ka jaka ba pyntrei ia ka lynti rel ha Tupul hadien ba ka la khyllem noh, 18 ngut na ki la ioh ban pyllait im.Kat haduh kane ka sngi U Blei ba ladep 56 tylli ki met iap la lah ban sei na kane ka jaka.
Napdeng ki ba iap ki kynthup ia ki 29 ngut ki shipai ka Indian Territorial Army bad 27 ngut ki riew paidbah.San ngut kiwei pat ki dang jah rngai ha kane ka jingtwa khyndew ia ka ba u Myntri Rangbah (CM) ka jylla u N.Biren Singh u la ong ka dei ka jingjia ba shyrkhei tam ha ka histori jong ka jylla.
Katkum ka kaiphot jurip bniah da ka tnat Geological Survey of India (GSI) la kdew ba kane ka jingjia twa khyndew ba dang shen hapoh Tupul Railway Station ha Noney district ka Manipur ka ba la shim ia ka jingim jong ki phew ngut ki briew ka la wan jia namar ka jingbym don ia ki jingker ki ba biang ha ka jaka sharing ba la mait na ka bynta ban shna ia ka projek lynti rel ka ba 110 km hapdeng ka Imphal bad Jiribam.
Kane ka jaka ha ka ba kane ka jingtwa khyndew ka la jia ka dei ka bym don jingshngain katkum ka National Landslide Susceptibility Mapping (NLSM) 2019, ong ka kaiphot.
Ki katto katne kiwei pat ki daw ki ba lam sha kane ka jingtwa khyndew ki kynthup ruh halor ka jinglum thup ia ki jaboh jabain ka ba la pynduna ia ka jingtuid jong ka um hapoh ka wah Ijai, bad ruh nalor ka jinglum thup ia ki ba bun bah ki tiar ki tar ba la pyndonkam na ka bynta ki jingtrei ba shipor bad ka jingbym don ia ki nala ki ba biang hapoh ki sharing lum.
