Shillong, Nailar 10 : U Myntri ka Tnad Bording AT Mondal ula pyntip ba ka Tnad bording ka lah ban pynkut noh ia ka MoU bala iasoi ban pyntreikam ia ka project Kynshi Stage-II ba lah bah pynmih ia ka bording ba 325 megawatt.
Haba iakrren bad ki nongthoh khubor hynne ka sngi Palei, u Mondal ula ong “Ka kompani kam kwah shuh ban nang pyn tyllun shakhmat ia ka project”.
Ula pyntip ba ia kane ka project yn sa pynkut noh shen. “Kane ka long namar ba ka kompani pynmih bording ba shimet kala wanrah ia ka model ba thymmai, kaba ki ong ka kham biang. Ki kwah ban pynkylla noh ia ka project kaba rim”.
“Hynrei ka kam ka long ba kane ka project ka dei kaba thymmai bad da ki buit bad ki kor technology ba thymmai phin ym lah ban shu pynkylla ia kawei pa kawei ka lain. Namar kata, kaei kaba ngi ong ha ki ba long ba ngin pyndam noh ia ka MoU barim bad ngin sa thaw ia ka MoU ba thymmai bad ngin sa iasoi ruh ia ka” bynrap u Mondal.
Ka Jaypee Meghalaya Pvt Limited, New Delhi kala pynpaw ia ka jingbym lah ban pynbteng ia kane ka project namar ka jingdon jong u mar Uranium ha ka thain.
Ha kajuh ka por, u Myntri ula pynpaw ia ka jingsngewsih ba kam shym la don kawei ruh ka project ba pyntrei da ki kompani shimet hapoh ka Jylla.
“Ngi la iasoi shibun ki memorandum hynrei nga sngewsih ban ong myta ba ym pat don kawei ruh ka memorandum kaba ka project kala iaid ha ka jingpyntrei da ki kompani shimet” ula ong.
Kat kum ka jingong jong u, namar kane, katto kane ki MoU kila iap noh bad ka Sorkar ka hap ban pynduh pyndam noh ia ki.
