Imphal, Jylliew 30 : Namar ka jingiai bteng khlem sangeh jong ki kam iaumsnam ha Manipur, u N Biren Singh u lah ban leit aiti ia ka shithi iehnohkam kum u Myntri Rangbah ka Jylla mynta ka sngi Thohdieng.
Kat kum ka khubor, u Biren Singh u lah ban leit aiti ia ka shithi iehnohkam ha u Lat ka Jylla Manipur Anusuiya Uiker, ha ka por 1 baje nohphaisngi.
Kane ka wan jia tang da ki sngi hadien ba u Myntri Rangbah u khlem lah satia ban wanrah ia ka jingshongsuk hapoh ka Jylla.
Kat kum ka khubor, la ailad ia u ba un iehnohkam lane kan shimti hi noh ka Sorkar Pdeng ban pynjari da ka President Rule hapoh ka Jylla. Dei halor kane ba u Biren Singh ula rai ban shu iehnohkam hi noh.
Ka khubor ka iathuh ba ka IIngdorbar Thaw Ain ka lah ruh ban shah pynsangeh treikam shipor.
Hadien hynriewphew sngi ka jingia umsnam ha ka Jylla, haduh 130 ngut ki briew kila duh ia la ka jingim ha ka jingialeh thma hapdeng ki jaidbynriew Meitei bad ki Kuki bad da ki phew hajar kila hap ban phet nala ki iing ki sem kiba la shah wiang ding bad shah pynjulor naduh ka 3 tarik u Jymmang.
Kane ka rai kala mih ruh hadien ba u Nongialam ka Congress Rahul Gandhi ula wan iuhkjat ha Imphal bad iakynduh ia ki briew ha ki jaka sah ba shipor.
U Rahul Gandhi ula wan poi ha Imphal ha ka sngi Palei bad un dang don mynta ka sngi Thohdieng ha kane ka Jylla.
