Shillong, Iaiong 16 : Ka kyrtong ka NPP na Shillong Parliamentary seat bad Myntri Rangbah Kong Ampareen Lyngdoh ha ka sngi Ba-ar, kala kular ban kren ia baroh ki ishu ba sahteng jong ka Jylla bad ka Sorkar Pdeng lada ka shah jied kum ka MP ka Lok Sabha.
Haba kyrpad ia ki paidbah ka Nongkrem Constituency ba kin ai ka jingkyrshan ba pura ia ka kum ka kyrtong, ka kong Ampareen kala ong “Nga la pynkhreh ban iakhun ia ka elekshon. Nga la leit iuhkjat hajan baroh ki shnong jong ki 36 tylli ki constituency bad iakynduh ruh ia ki briew ha kine ki Shnong.”
“Watla nga dei tang ka Kynthei, nga sngewskhem ba nga lah ban wanrah ia ka jingkylla ha ka synshar khadar, kaba ka Sorkar MDA ka donkam bha namar ka donkam ia ki briew kiba lah ban pyniajan bad ka Delhi ha kaban kren ia ki ishu ka Jylla. Nga sngew ba nga dei kata ka briew, kaba lah ban mihkhmat ia kane ka constituency bad nga kular ba ngan trei shitom bha ha kaban tynruh ia ki ishu ba sahteng jong ka Jylla bad ka Sorkar Pdeng” kala bynrap.
Ka Kong Ampareen kala kyrpad ruh ia ki paidbah ba kin buh shadien ia ka jingsngew party bad ki lama jong ki party kiba ki kyrshan ha ka elekshon MLA bad mDC bad ban ai noh ka jingkyrshan ba pura ia ka kum ka kyrtong ha kane ka elekshon MP Lok Sabha.
“Ka bor ka shong ha phi ban rai la I Kong Ampareen Lyngdoh i biang ne em ban mihkhmat ia ka Shillong Constituency bad ban shong lang bad palat 500 ngut ki MP ha Parliament” kala ong.
Haba pynpaw baka thong jong ka, ka long ban wanrah ia ka roi ka par sha Jylla, ka kong Ampareen kala ong “Kito kiba la kren shibun kiei kiei pyrshah ia nga kin sa wan sha nga ha kawei ka sngi bad ban pan jingiarap hynrei nga kular ia phi ba ngan iarap beit ia phi bad kular ba ki skhim kam pynroi ba ai da ka Sorkar India kin poi sha phi iwei pa iwei”.
Ka Kong Ampareen kala kyntu ruh ia ki paidbah ba kin shim ia ka rai hadien ba kila dep ai ka lad sha kiwei ba kin long MP ha kine ki 15 snem bala leit noh bad ong “Phi la dep mad ka long kumno ban phah ia u MP, uba hap ban shong ha ka Liang Pyrshah, kam don satia kano kano ka kam pynroi. Kumta, kane ka dei ka kabu ia phi ban shim ia ka rai”.
