Shillong, Nailar 23 : Haba pynthikna ba ka jinglong ba jai jai kala wan phai biang ha khappud ka Assam-Meghalaya, u Deputy Commissioner ka Ri-Bhoi Dr Abhishek Saini ha ka Sngi U Blei ula pyntip ba la weng lut mynta ia baroh ki pakhang surok ha Ri-Bhoi bad ki kali kila iaid la ieng laitluid ha Umiam.
U Saini ula ong ba ka All Khasi Meghalaya Tourist Taxi Association bad kiwei ki kynhun, kiba la ialum lang ha Umiam ryngkat ki jingdawa jong ki, kila mynjur ban iapra noh hadien ka jingialang bala pyniaid da u Symbud Myntri Rangbah.
“Ki don ki seng na Meghalaya, khamtam ka All Khasi Meghalaya Tourist Taxi Association, kila ialum ha Umiam. Ki don ia ki katto katne ki mat jingdawa jong ki bad mynta ka sngi ngi la iashong jingialang bad u Symbud Myntri Rangbah lem bad kine ki seng baroh, ma nga bad u SP bad na Shillong ruh kumjuh. Ka jingialang ka long kaba seisoh bad kila mynjur ban iapra noh” ula ong.
U Deputy Commissioner ula ong ba da ka jingweng noh ka Assam ia ka pakhang surok ha Jorabat, na ka liang ka Meghalaya ruh kala weng noh ia ka pakhang surok.
“Kan ym don shuh kano kano ka pakhang surok. Kumba ngi tip ba na ka liang ka Assam, kila dep weng ia ka pakhang surok na Jorabat, bad mynta na Umiam ruh, ki seng kali tourst kin sa weng noh ia ka pakhang surok bad kan sa don ka jingiaid kali ba laitluid ia baroh” ula ong.
Haba kyntu iaki nongjngohkai ba kim dei ban syier, ula ong “Nga kyntu ia baroh ki nongjngohkai bad ki briew kiba wan na Assam ne kito kiba leit na Meghalaya sha Assam- ki long kiba pdiang bad kila lah ban iaid ban ieng laitluid mynta. Ngim kwah ban don kano kano ka jingsngew sheptieng ha ka jingmut jingpyrkhat ki briew”.
Ula ong ia ka bor district kala kut jingmut na ka bynta ka jingshngain jong baroh ki nongshongshnong bad ki nongjngohkai bad ki kali Pulit kila ai ka jingsynran ia ki trok kit umphniang, kiba la sangeh ban wan namar ka jingtieng.
“Ka jingkit ia ki umphniang kala sdang hynrei ki don katto katne ngut namar ka jingtieng bad ka jingsaphriang ki khubor, kim kwah ban rung sha Meghalaya. Ngi la ai ia ki polic escort ia ki. Kan nym don shuh ka jingkhang ia ki trok kit umphniang la ki dei ki POL, LPG ne ki kiwei kiwei bad kumjuh ruh ki kali shimet” bynrap u Saini.
Ha kajuh ka por, u SP Giri Prasad ula pyntip ba ka bor district kala pyntreikam ia u helpline nombor ba treikam baroh 24 kynta na ka bynta ki nongjngohkai.
