Shillong, Nohprah 04: Ki nongialam jong ka Meghalaya Liberation Association of Visually Impaired (MLAVI) hynne ka sngi kila pynbna ban pyndam noh iaka seng.
Ia kane ka rai ban pyndam noh iaka seng la shim namar ka jingshim kabu palat ki briew ban khrong pisa haka kyrteng jong ka seng bad namar ka jingbym lah ban Register iaka seng.
Haba pyntip ia kane u President ka seng Bah Elkin Rynniaw ula iathuh ba haka jaka jong ka seng MLAVI, la thaw noh daka National Inclusive Society for Downtrodden Community (NISDC).
U Bah Elkin ula iathuh ba haka jingialang haka 9 tarik Risaw, la shim iaka rai ban pynduh pyndam noh iaka MLAVI namar kam don jingmut shuh ban pynkhie im biang iaka bad naka por shaka por la shem ba ki don ki briew kiba lum pisa haka kyrteng jong ka seng.
“Lyngba ka jingpynduh pyndam noh iaka MLAVI ki briew kin nym lah shuh ban shim kabu namar nangne shakhmat ka jinglum jingiarap kan dei beit lyngba ka NISDC” la ong u Bah Elkin.
Nalor kane u Bah Beningstar Kharpor uba duno haka bor iohi ula kyntu iaki breiw ba kim dei shuh ban pyndonkam iaka ktien matlah namar ka kyntien ka long kaba khor hynrei ki paidbah kidei ban pyndonkam beit daka kyntien duna haka bor iohi ne duna dkhot met.
U Bah Beningstar ula kyntu ruh iaki paidbah nong shong shnong ka Jylla ban aitreilang bad ki breiw ba duna dkhot met ban pynurolong iaki 17 tylli ki mat Sustainable Development Goals (SDG) jong ka United Nation naka bynta ki briew ba duna dkhot met.
