Guwahati,Jymmang 7: Hadien ki jinghiar thma ki shipai India hajan khappud bad ka Pakistan ha ka step phyrngap, ki katto katne ki kad liengsuiñ kiba don ha ka thaiñ shatei jong ka India, ki la khang khyrdep ha ka sngi Balang.
Katkum ka jingiathuh ki heh ophisar, ka Srinagar Airport ka dei kaba nygkong eh ban khang, bad kiwei ki kad lieng suin kila pyntikna ha ki social media kynthup ïa ka Leh, Jammu, Amritsar bad Dharmshala.
Ka Air India kaba dei ka National carrier kala pynbna ba baroh ki lieng suin kiba leit bad kiba wan na Jammu, Srinagar, Leh, Jodhpur, Amritsar, Bhuj, Jamnagar, Chandigarh, bad Rajkot la pynsangeh noh haduh ka por 12 mynmiet jong ka sngi Balang bad ka IndiGo kham hadien kala pynbna lang kumjuh ha Bikaner.
Ki kompeni liengsuiñ ki la pyntip sha ki nongleit nongwan lyngba ki social media shaphang ki jingpynslem bad jingpynsangeh kiba lah ban jia, da kaba kyntu ïa ki ban peit bniah ïa ka jinglong jingman bad ban thaw lad da kiwei pat ki rukom ha ka leit ka wan katkum ka jingdonkam.
Na ka liang ki bor ba dei khmih kim shym pat la pyllait kano kano ka jingtip ba bniah ha kaba iadei bad ka operation jong ki shipai lane sa haduh katno yn dang hap khang ia ki liengsuin.
