Shillong, Nailar 11 : Ki Pulit ka South West Khasi Hills, kila ioh ban kem haduh 6 ngut na ki runar Bangladesh kiba wan rung jubor ha ka Shnong Rongdangai, South West Khasi Hills ban rahbor ia uwei u rangbah ka thain myn ha ka sngi Thohdieng jong ka taiew bala lah.
Sa uwei napdeng kine ki runar la ioh ban kem da ki paidbah ka Shnong Kaitha Kona, ha ka janmiet sngi Nyngkong.
Kiba la shah kem baroh lang, kila kot ia ka 6 ngut kynthup ia 4 ngut kiba kem na Khonjoy bad uwei ba kem na ka shnong Gilagora.
Kat kum ka jingpyntip u Superintendent of Police ka SWKH, la iathuh ba ki paidbah ka Kaitha Kona kila iohkem ia une u runar Bangladesh ha ka por 4:30 baje janmiet. La tip kyrteng ia u da u Akram, uba dei na Sherpur, Jenaghati, Bangladesh.
Ia une u briew la kit noh sha Maheshkhola PHC ban sumar ia ki jingmynsaw na ka jingshah bom shah tied ha ki paidbhur ka thain.
Kat kum ka jingiathuh ki Pulit, kine ki runar kila wan kumba 8-9 ngut ban rung ha Rongdondai bad rahbor ia u Balsrang hynrei une u rangbah ula ioh ban phet na kti jong ki ha ka shnong New Rongdangdai bad leit rieh ha kawei ka Iing.
Kine ki runar kila leit tied ia ka jingkhang jong kane ka Iing bad kila siat ruh katto katne kuli, kaba la pynlong ia kane ka iing ban plie ba kin rung. Kine ki runar kila shoh pynmynsaw ia u Balsrang hashuwa ba kin phet na kane ka jaka.
Ha ka janmiet sngi Saitjain, ki Pulit kila ioh jingtip ba katto katne ngut na kine ki runar Bangladesh kila leit rung ha kawei ka khlaw kaba don ha Khonjoy. Mar mar ha ryngkat bad ki BSF, kila pynlong ia ka jingkhynra bad kila ioh kem ia 4 ngut.
Kine ki saw ngut ki kyrteng u Mefus Rehman (35 snem) uba dei na Debidar District Cummila Bangladesh, u Jangir Alom (25 snem) uba na Kaziar Char PS, Jamalpur District Sadar Jamalpur Bangladesh, u Meruphur Rahman (32 snem) uba na Namapara PS: Mandargoan District Jamalpur Bangladesh bad u Saem Hussain (30 snem) uba na Mizmizi PS, Siddirgonj District Narayangonj Bangladesh.
Ia uwei pat la kem ha ka Sngi U Blei na ka shnong Gilagora bad la tip kyrteng ia u da u Mubarak Hussain uba dei na ka shnong Kalagaon Sonamganj, Bangladesh.
Lah ban kdew ba ki Pulit kila ioh kurup ruh ia uwei u sde, kawei ka jingot sainar, kawei ka black magazine pouch, 1 ka jingsop ban kah dur, 1 screw driver, 1 ka wrench, 1 ka black pistol holster, 1 ka tari rit bad ka jingsop, kawei ka Bangladesh police ID card, 3 tylli ki pla thep pisa, 3 tylli ki wireless handsets bad 4 tylli ki Charger.
