Shillong, K’lyngkot 30: U Myntri Rangbah ka jylla Meghalaya Conrad K. Sangma u la pynbna ba ka Sorkar Pdeng kala ai jingbit ban tih dewiong noh da ka jingstad saian hapoh ka Jylla haba pynpaw ia kane ka sngi kum ka “sngi sah jingkynmaw ha ka histori” ia ka Jylla Meghalaya.
Haba thoh ha social media “X”, u Conrad ula pynthikna ba ka Sorkar Jylla ha ryngkat ka Ministry of Coal, kila pynioh ia ka jingbit ban tih dewiong da ka jingstad saian ha Jylla. Kane ka rai ka pyni ia ka jingkylla ha ka jingshim ia ki polici treikam, haba tehlakam ia ka jingpynjulor ia ka mariang bad kiwei ki kyndon bala pyrrkhing bad pynthikna ia ka jingkiew ka ioh ka kot hapoh ka Jylla.
Kum shibynta na kane ka rai, ka Controller of Coal, ka Sorkar India bad ki trai ban tih par ha Jylla, kila iasoi ia lai tylli ki soskular Escrow ba kin sdang tih noh ia u dewiong ha ki lai tylli ki jaka :
– Pyndengshalang, West Khasi Hills
– Saryngkham, East Jaintia Hills
– Lumiakhi-Wahsarang, East Jaintia Hills
Kine ki soskulr ki dei ki sienjam ba kongsan ha kaban pynsdang noh ia ka jingtih dewiong kat kum ki kyndon tih dewiong da ka jingstad saian.
U Conrad ula pynpaw ruh ba nalor kine ki lai tylli ki project, sa 12 tylli ki aplikeshon kila don ha ka jingbishar ban ai ia ka jingmynjur. Ka Sorkar Jylla ha ryngkat bad ka Tnad Mining & Geology, kala trei khlem shongthait ban pynsted ia kane ka kam.
