Shillong, Nohprah 30 : U Myntri ka kam Jngohkai Bah Paul Lyngdoh ha ka sngi Nyngkong, ula ban jur ia ka jingdonkam ba ki kynhun bapher bapher kynthup ki Dorbar Shnong, ba kin wanrah iala ki jong ki Standard Operating Procedure (SOP) ban tehkyndon ia ki briew kiba wankai sha ki jaka jngohkai bapher bapher hapoh ka Jylla.
Kane ka jingkren kala mih hadien ka jingjia bad dang shen ha kawei ka Iingmane ha Mawlynnong, East Khasi Hills ha kaba uwei u nongwan sangkai ula pyrta “Jai Shree Ram” hapoh kane ka Iingmane nalor ka jingbyrngem jong kawei ka seng Hindu Kutumba Surakshya Parishad (KSP) pyrshah ia ka jingkhang lehniam hapoh ka krem Mawjymbuin ha Mawsynram.
Haba iakren bad ki nongthoh khubor, u Bah Paul ula ong “Ka long kaba sngewsih ba mih kum kine ki briew kiba pyrshang ban pynthut ia ka shongsuk shongsain ha ka Jylla jong ngi. Kum u Myntri ba khmih ia ki kam jngohkai, nga pynrem jur ia kum kine ki jingpyrshang lyngba ki jingjia ba jia ha Iingmane Mawlynnong bad ruh kito ki kynhun (halor ka krem Mawjymbuin) kiba pynkylla kam niam”.
“Hynrei kine (ki jingjia) ki dei shibynta jong ki riewshitniam Hindu, kiba ngi pyrshah jur bha” ula bynrap.
U Bah Paul ula ban jur ia ka jingdonkam ba ki Balang kin don ia ki katto katne ki jingpyrrkhing ha ki Iingmane kum ia kimno ki briew ba dei ban ailad ban rung shapoh ka Iingmane.
Kat kum ka jingong jong u, ha kiwei ki Ri, ki don da ki kyndon ban shah ia ki briew ba kin wan bad rung shapoh ki Iingmane.
“Ka jingjia (ha Iingmane Mawlynnong) ka dei ban long ka jingpynpeit mat ia ki Balang namar kane ka hap baroh hapoh ka jingkhmih jong ki Balang bad kam don jingiadei eiei bad ka Sorkar” ula ong haba kular “Ngi (kum ka Sorkar) ieng khem ba ngin nym ailad ia ki riewshitniam ba kin shim kabu ia ka jinglong jingman da ka jingthmu ban pynthohbriew ia ka Jylla lyngba kine ki kam khlem ka jingkitkhlieh”.
Ula ong ba ka Director General of Police (DGP) kala pyntip ba ka Tnad Pulit kala dep ithuh ia une u briew ba donkti bad ka Ain kan sa shim iala ka jong ka lynti.
 ban tehkyndon ia ki briew kiba wankai sha ki jaka jngohkai bapher bapher hapoh ka Jylla.){kind=link}