Shillong, Jymmang 20 : U Working President ka NPP-Meghalaya bad Myntri Sorkar Marcuise N Marak ha ka sngi Ba-ar ula ong ba ki seng sain pyrthei ba don ha Liang Pyrshah, kila kyrthat mynta ban neh mynsiem ha Ri-lum Garo namar ba bun ki nongialam bad ki nongkitkam kila wan iasoh sha ka NPP.
“Jan baroh ki nongialam ka All India Trinamool Congress (YMC) bad ka Indian National Congress (INC) kila wan pyniasoh sha ka NPP. Bun bah kila kulmar khlieh ia ka jinglong jingman jong ka party” ula ong haba iakren bad ki nongthoh khubor haba kynthoh pat ba ka seng Voice of the People Party (VPP) ka dei ka bym pat pdiang da u paidbah ka thain.
Kat kum ka jingong jong u, ka seng Congress, kaba dei ka party bala rim tam hapoh ka Ri bad ha Ri-lum Garo, kala iaksaid mynta namar ba bun ki nongkitkam kila wan phet sha ka NPP bad watla ha ka elekshon MP ba dang shu dep, kila jop hynrei kam mut pat ba ki dang suhthied ha Ri-lum Garo” ula bynrap.
Haba iadei bad ka TMC, une u nongialam ka NPP ula ong ba bun bah ki nongkitkam ka TMC kila kulmar khlieh la ki dang iai neh ne em bad ka TMC.
“Katto katne na ki nongialam kila kular khlieh la kin dang iai neh ne em bad ka TMC. Ngi la ioh ia ki jingtip na ki briew jong ki hi. Ngam ong ba kila iapait iapra, hynrei nga ong ba kila kulmar khlieh la kin dang iai neh ne em bad ka TMC namar ka long kaba eh bha ia ki paidbah ban pdiang ia ka TMC ha Ri-lum Garo” ula bynrap.
Haba kyntait ban kynthoh la ki nongialam ka TMC-Mukul Sangma bad Charles Pyngrope kin mih noh na ka party, u Marcuise ula ong “Kila kham rangbah ban ia nga. Phi lah ban kylli ia kane ka jingkylli na ki. Ngam don eiei ban ong halor jong ki”.
Halor ka jingpyrshang ka VPP ban bsuh khlieh ha Ri-lum Garo, une u Nongialamka NPP ula ong ba ki paidbah kim pat pdiang satia ia kane ka party thymmai ha Ri-lum Garo namar ba kim don satia ia ki nongialam kiba pdiang da ki paidbah jong ka thain.
