Shillong, Jylliew 06 : U Myntri ka Tnad Animal Husbandry bad Nongialam ka BJP Bah AL Hek ha ka sngi Thohdieng, ula kyrshan ia ka jingdawa ban tohkit da ka Central Bureau of Investigation (CBI) halor ka jingjia ba ngiew kaba la wan jia ia ki shikurim na Indore, kiba wan honeymoon sha Sohra.
Haba iakren bad ki nongthoh khubor, u Bah Hek ula ong “Hooid, ngi ruh ngi ong ia kata ba ka donkam ia ka jingtohkit da ka CBI. Wat u Myntri Rangbah ula phah ia ka shithi ba pan ia ka jingtohkit CBI”.
Ula ong ba ki bor Sorkar bad ki Pulit ka Jylla kila leh kat kaba lah ban iai bteng ha kaban wad ia ka kurim jong u Raja Raghuvanshi, ia kaba ka metiap jong u la lap haka 2 tarik Jylliew najan Kshaid Weisawdong, ka Sonam Raghuvanshi kaba dang jah rngai haduh mynta.
U Bah Hek ula pyntip ba hadien ka jingioh pdiang ia ki jingtip na ka BJP ha Madhya Pradesh ba kine ki shijur kila jah rngai ha ka 23 tarik Jymmang, ula leit ban khmih dalade ia ka jingiawad ia kine ki arngut ha ka 24 tarik Jymmang.
U Myntri ula iathuh ba ki paidbah ka thain kynthup ki khlieh nongsynshar ka thain kila ai ka jingiarap ban iawad lem ia kine ki shijur.
Haba ther tyngeh ia ki national media ba ki ai khubor ba bakla halor kane ka jingjia kaba pynjah burom ia ka Jylla Meghalaya, u Bah Hek ula ong “Kane ka dei ka bym lah ban pdiang da lei lei ruh”.
“Ki pulit ki dang tohkit ban tip ia ki jingshisha baroh ia kaei kaba jia. Ban ong ba baroh ki nong Meghalaya ki dei ki nongpyniap briew ka dei ka bym lah ban pdiang. Nalor kane, da ki hajar ki nongshangkai kila wan sha Meghalaya man la ka sngi bad kam pat ju don kum kine ki jingjia. Tang namar kawei ka jingjia ba shu jia ryngkhat, phi ong noh ba ki nong Meghalaya ki dei ki nongpyniap briew ka dei ka bym iahap bad dei ban pynrem jur” ula ong.
“Nga kwah ban phah ia ka khubor kaba shai sha ka Sorkar Pdeng bad ka Madhya Pradesh ba ki paidbah ka Meghalaya kim ju shun ne leh pyrshah ia ki nongwan shangkai ne ki briew ba nabar ka Jylla” ula bynrap.
Haba pynpaw ba ki riew bymman ki don beit ha manla ki Jylla hapoh ka Ri, u Bah Hek ula ong “Ki briew kiba don ia ka jingmut jingpyrkhat bymman ki don kat shaba phai. Hato ngi lah ban ong ba ym don runar ha Madhya Pradesh, Indore?. Hato ngi lah ban ong ba ym don kam bymman ha Madhya Pradesh, ha India?. Ki kam bymman ki jia kylleng ki jaka hynrei tang namar kawei ka jingjia bad phi kynnoh noh ia baroh kawei ka Jylla ka dei kaba bakla shibun”.
